Раевка үҙәк район дауаханаһына өлкәндәрҙе алыҫ ауылдарҙан махсус “Мобиль бригада” ярҙамында килтереү ойошторолған. Был эш “Демография” милли проектының “Өлкән быуын” төбәк проектына ярашлы башҡарыла. Оло йәштәгеләр өсөн бик уңайлы, ҡыҫҡа ғына ваҡыт эсендә тикшереүҙәр үтергә, консультация алырға мөмкинлек бирә. Медицина профилактикаһы бүлексәһендә өлкәндәрҙең күҙҙәре сәләмәтлеген тикшерәләр, аҙаҡ башҡа кабинеттарға электрокардиография, флюорография, маммография үтергә ебәрәләр. Шулай уҡ лаборатория тикшереүҙәре үткәрелә. Анализ һөҙөмтәләренә ҡарап, пациенттар өсөн артабанғы тикшереүҙәр билдәләнә. Өлкәндәр шулай уҡ киҙеүгә ҡаршы прививка яһата ала. –Бындай эш рәүеше өлкән быуындың сәләмәтлеген һаҡлауҙа бик тәьҫирле сара. Ауылда йәшәгән 65 йәштән өлкән кешеләргә медицина тикшереүҙәре, скринингтар үткәреү һәм дауалар тәғәйенләү ҡаралған,– тине Раевка дауаханаһының баш табибы Венер Иҙәкәев. “Демография” милли проектының (национальный проект”Демография”) “Өлкән быуын” төбәк проекты оло йәштәгеләрҙең сәләмәтлеген һәм именлеген яҡшыртыуға йүнәлтелгән сараларҙың комплекслы системаһын барлыҡҡа килтереүгә йүнәлтелгән. Программаның бер өлөшө – өлкәндәр өсөн медицина хеҙмәттәренән файҙаланыу мөмкинлеген арттырыу. Уға вакцинация, иҫкәртеү тикшереүҙәре, диспансер күҙәтеүе, йығылыуҙарҙы һәм имгәнеүҙәрҙе иҫкәртеү кеүек саралар инә. Комплекслы медицина ярҙамы сәләмәтлекте һаҡлауҙан тыш, өлкәндәрҙең илдең иҡтисади үҫешенә лайыҡлы өлөш индереүенә булышасаҡ. Программа медицина аспекттары менән генә сикләнмәй, уға әүҙем оҙайлы ғүмерҙе дәртләндереү, гериатрия хеҙмәттәрен һәм бүлексәләрен ойоштороу, сәләмәт йәшәү рәүешен пропагандалау кеүек бурыстар ҙа инә. Фото: Һаулыҡ һаҡлау министрлығы.