Ҡаҙағстан - беҙҙең өсөн яҡын, туғандаш республика

24 ғинуарҙа Астанала Башҡортостан Башлығы Радий Хәбиров “Ҡаҙағстан - Башҡортостан” бизнес-форумын асыу тантанаһында сығыш яһаны. Сара Ҡаҙағстандан 400 предприятие һәм Башҡортостандан 70 компания вәкилдәре ҡатнашлығында ҡаланың Конгресс-үҙәге майҙансығында үтә. Эшлекле программала Башҡортостандың презентацияһы, B2B форматында эшлекте осрашыуҙар һәм һөйләшеүҙәр, пленар сессия һәм ике яҡлы хеҙмәттәшлекте үҫтереү буйынса эшсе төркөм ултырышы планлаштырылған. Форумда ҡатнашыусыларҙы ҡабул итеүсе ил исеменән Ҡаҙағстандың сәнәғәт һәм төҙөлөш министры Канат Шарлапаев сәләмләне. – Бөгөнгө сара Рәсәй Федерацияһы һәм Башҡортостан менән үҙ-ара хеҙмәттәшлекте үҫтереүҙә стратегик әһәмиәткә эйә. Һуңғы йылдарҙа Ҡаҙағстан менән Башҡортостандың тотороҡло яҡшы мөнәсәбәттәре барлыҡҡа килде. Беҙ сауҙа әйләнешенең үҫеүен билдәләйбеҙ, ағас эшкәртеү, химия тармағы һәм машиналар эшләү өлкәһендә берлектәге проекттарҙы тормошҡа ашырабыҙ. Ә 2023 йылдың сентябрендә Астанала “Иннопром” халыҡ-ара күргәҙмәһендә Ҡаҙағстан һәм Башҡортостан 2023-2024 йылдарға хеҙмәттәшлекте үҫтереү буйынса саралар планын раҫланы. Беҙҙең халыҡтар дөйөм мәҙәни мираҫ менән бәйләнгән. Ә Радий Фәрит улы Хәбировтың, төбәк Хөкүмәтенең тырышлығы һөҙөмтәле эшлекле хеҙмәттәшлек өсөн дә майҙансыҡ булдырырға мөмкинлек бирҙе. Форум йомғаҡтары буйынса үҙ-ара мөнәсәбәттәребеҙҙе тағы ла көслөрәк нығытырбыҙ, тип ышанам, – тине Канат Шарлапаев. Башҡортостан Башлығы үҙенең сығышында иҡтисадтың һәм социаль өлкәнең төрлө тармаҡтарында үҙ-ара хеҙмәттәшлекте үҫтереү өсөн мөмкинлектәрҙе юғары баһаланы. – Һеҙгә яҡшы кәйеф, етди ниәттәр һәм хеҙмәттәшлегебеҙ артабан да йылдам үҫешәсәк тигән ышаныс менән килдек. Ҡаҙағстан - беҙҙең өсөн төп иҡтисади уҙаҡташ. Шулай уҡ Ҡаҙағстандың беҙҙең өсөн яҡын, туғандаш республика булыуы ла мөһим. Беҙҙе дөйөм мәҙәниәт, йолалар һәм иҡтисадтарҙың билдәле бер оҡшашлығы бәйләй. Ике дәүләт башлыҡтары Владимир Владимирович Путин менән Ҡасим-Жомарт Камил улы Токаевтың сәйәси өлөшө һәм үҙ-ара ихтирамлы мөнәсәбәттәре беҙгә үҙ-ара хеҙмәттәшлекте үҫтерергә мөмкинлек бирә. Мөһим һәм оҙайлы пландар менән килдек. Үҙ-ара мөнәсәбәттәрҙе нығытыуҙың беренсе этабын уңышлы үтеүебеҙҙе, эшҡыуарлыҡ бәйләнештәрен яйға һалыу өсөн инфраструктура булдырыуыбыҙҙы ҡәнәғәтлек менән әйтә алам, – тип билдәләне Радий Хәбиров. Республика етәксеһе Радий Хәбиров берлектәге эштең аныҡ һөҙөмтәләрен дә билдәләне. – Беҙҙең хеҙмәттәшлектең “юл картаһында” күп йүнәлештәр бар. Өфөнөң Астана һәм Алматы менән даими авиабәйләнешен астыҡ та инде. Хәҙер рейстар һанын арттырырға кәрәк. Индустриаль секторҙарҙа сәнәғәт кооперацияһына күсәбеҙ, – тип өҫтәне Радий Хәбиров. – Ҡаҙағстан – XXI быуатҡа ынтылған дәүләт. Һәм беҙ, һис шикһеҙ, һеҙҙән яңы эш алымдарын өйрәнәсәкбеҙ. Үҙ сиратыбыҙҙа тәжрибә уртаҡлашырға, мөнәсәбәттәрҙе әүҙем үҫтерергә әҙербеҙ. Һәм, әлбиттә, Ҡаҙағстан коллегаларын һәм уҙаҡташтарын 2024 йылдың көҙөндә Өфөлә үтәсәк Рәсәй менән Ҡаҙағстандың XX төбәк-ара хеҙмәттәшлек форумында ҡатнашырға саҡырабыҙ. *** Журналистар менән әңгәмәлә Башҡортостан Башлығы Радий Хәбиров төбәктең тышҡы иҡтисади сәйәсәтен тормошҡа ашырыуҙың хәҙерге этабы үҙенсәлектәре хаҡында ла һөйләне. – Рәсми делегация менән сит илгә сыҡҡанда коммуникациялар, аралашыу инфраструктураһы каналдарын асабыҙ. Бизнес мөнәсәбәттәрҙең үҙенсәлектәрен бик нескә тоя. Тышҡы иҡтисади эшмәкәрлек бик еңел түгел. Сит илдә, сит ил хоҡуҡи системаһында эшләү өсөн төбәктәр һәм илдәр етәкселеге кимәлендә абсолют үҙ-ара аңлашыу булыуы бик мөһим. Хәҙер Ҡаҙағстан менән ул яйға һалынған. Был процесс беҙ теләгәнсә генә булмай, уны көйләргә кәрәк. Ҡаҙағстан ресурстарға бик бай ил. Беҙ бурысыбыҙҙы үтәйбеҙ – юлдар, мөмкинлектәр асабыҙ һәм бында эшләргә мөмкин булыуына гарантия бирәбеҙ, – тип билдәләне Радий Хәбиров. Белешмә: 2023 йылдың ғинуар–ноябрь айҙарындағы мәғлүмәттәр буйынса, Ҡаҙағстан Тышҡы сауҙа әйләнеше күләме буйынса 10,9 процент өлөш менән Башҡортостандың уҙаҡташ илдәре араһында өсөнсө урынды биләй. Башҡортостандың Ҡаҙағстан менән хеҙмәттәшлегенең өҫтөнлөклө йүнәлештәре булып юл хужалығы өлкәһендә инвестициялар йәлеп итеү һәм авиация төҙөлөшөндә, кальцийлы сода етештереүҙә, нефть химияһы һәм нефть эшкәртеү сәнәғәтендә берлектәге проекттарҙы тормошҡа ашырыу тора. Фото һәм мәғлүмәт сығанағы: glavarb.ru