24 ғинуарҙа Астанала Башҡортостандың рәсми делегацияһының Ҡаҙағстанға бизнес-миссияһы сиктәрендә хеҙмәттәшлек буйынса эшсе төркөмдөң ултырышы уҙҙы. Сараны асып, Башҡортостан Республикаһы Хөкүмәте Премьер-министры Андрей Назаров, ике республиканың етәкселәре йәлеп ителеүе күп кенә көнүҙәк мәсьәләләрҙе хәл итеүҙе тиҙләтергә мөмкинлек бирә, һөҙөмтәлә был үҙ-ара тауар әйләнешендә һәм инвестицияларҙа ыңғай сағыла, тип билдәләне. Мәҫәлән, 2022-2023 йылдарҙа Башҡортостан экспортерҙары Ҡаҙағстан бизнесы менән яҡынса 1,4 миллиард һумға контракт төҙөнө. - Беҙ төрлө масштабтағы компанияларҙың партнер ил территорияһына «инә» алыуына һәм шул уҡ ваҡытта беҙҙең ярҙамды тойоуына булышлыҡ итәбеҙ. Беҙҙең хеҙмәттәшлектең ҡеүәте ғәйәт ҙур һәм уны тормошҡа ашырыуҙың емештәрен күреү бик күңелле, - тип һыҙыҡ өҫтөнә алды Андрей Назаров. Башҡортостан Хөкүмәтенең беренсе вице-премьеры - иҡтисади үҫеш һәм инвестиция сәйәсәте министры Рөстәм Моратов ике республика араһында сауҙа-иҡтисади хеҙмәттәшлек йомғаҡтары менән таныштырҙы. Ул ике төбәк араһындағы сауҙа әйләнешенең 2023 йылдың 11 айында 3,1 процентҡа үҫеүе хаҡында әйтте. Бөгөнгө көнгә Башҡортостан менән Ҡаҙағстан араһында байтаҡ йүнәлештәр буйынса ике яҡлы хеҙмәттәшлек булдырылған, шуларҙың береһе – нефть сәнәғәте. Мәҫәлән, «Пакер» компанияһы Ҡаҙағстанды йылына 90 миллион һум самаһы суммаға нефть һәм газ сығарыу өсөн пакер-якорь ҡорамалдары һәм скважина эсендәге йыйылмалар менән тәьмин итә. Башҡортостан Хөкүмәте вице-премьеры – ауыл хужалығы министры Илшат Фәзрахманов аграр секторҙағы берлектәге проекттар хаҡында доклад менән сығыш яһап, 2023 йылда Башҡортостандың Ҡаҙағстанға 120 мең тонна агросәнәғәт комплексы продукцияһын оҙатыуы хаҡында һөйләне. Шулай уҡ күрше илгә ҡымыҙ һәм башҡорт тоҡомло ат, бройлерҙарҙың инкубация йомортҡаларын оҙатыу яйға һалынған. Ҡаҙағстандың сәнәғәт һәм төҙөлөш министры Канат Шарлапаев республикалар араһында хеҙмәттәшлекте киңәйтеүгә системалы ҡараш өсөн рәхмәт белдерҙе. Сығанаҡ: pravitelstvorb.ru