Башҡортостандың Айырыуса һаҡланған тәбиғәт биләмәләре дирекцияһының төп хеҙмәткәрҙәре — инспекторҙар. Үҙенә йөкмәтелгән бурыстарҙы сифатлы башҡарыу өсөн инспектор яуаплы, ҡыйыу булырға тейеш. Ә иң мөһиме – тәбиғәтте һәм үҙ ерҙәрен яратырға, ысын илһөйәр булыуы шарт. Был сифаттарҙың барыһы ла “Асылыкүл” тәбиғәт паркынында оҙаҡ йылдар инспектор булып эшләгән Салауат Миңлебай улы Абзаловта бар. Тәбиғәт паркында эшләүҙән тыш, ул “Өҫән-Ивановский” ботаника заказнигын да ҡарай. Тәбиғәт һағында торғандарҙың ялдары ла, байрамдарға туҡтап тын алырға ла ваҡыттары юҡ. Урында тикшереүҙәр, хайуандарҙы ашатыу буйынса биотехнологик саралар үткәреү, һунар ресурстарын даими күҙәтеү, туристарҙың ағымын көйләү һәм башҡа бихисап эштәре бар. Бынан тыш, Салауат Миңлебай улы Асылыкүлдең һайығыуы өсөн борсола һәм был күренеште туҡтатыу өсөн ҡулынан килгәндең барыһын да эшләй. Тәбиғәт паркы биләмәһендә хәүефһеҙлек сараларын тәьмин итеү инспекторҙар өсөн иң яуаплы эш икәнен инҡар итеп булмай, сөнки тап уларға барконьерҙар менән күҙгә-күҙ осрашырға, атыу осраҡтарын теркәргә, законды боҙоусы менән тәүгеләрҙән аралашырға тура килә. Ярһыған браконьерҙарҙы тынысландырыу, хоҡуҡ һаҡлау органдары вәкилдәрен көтөү еңелдән булмай. Хатта бер нисә тапҡыр уға мылтыҡ та тоҫҡайҙар... «Өҫән-Ивановский» заказнигы биләмәһендә йәшәгән ҡыр хайуандарына аҙыҡ ҡеүәтен арттырыу маҡсатында инспектор Абзалов даими рәүештә биотехнологик саралар үткәрә: бесән һәм миндек әҙерләй, “ашхана” эшләй. Хайуандар, айырыуса мышылар, тоҙһоҙ интекмәһен өсөн ошо махсус ашханалар һәм мышылар йөрөгән урындарға тоҙ ҡалдырып китеүҙе даими башҡарып тора. Салауат Миңлебай улы “Асылыкүл” тәбиғәт паркында 2017 йылдан, ә урман хужалығы тармағында 20 йылдан ашыу эшләй. Үҙ эшендә яуаплы, намыҫлы белгес. Ә ғаиләһендә өлгөлө атай, ир: һөйөклө ҡатыны менән бергә өс бала үҫтергәндәр, хәҙер ейән-ейәнсәрҙәрен тәрбиәләргә ярҙам итәләр. Эштән тыш Салауат Миңлебай улының мауығыуҙары күп. Баҡсасылыҡ һәм малсылыҡ менән шөғөлләнә. Салауат Миңлебай улы кеүек ысын ир-егеттәр тәбиғәт һағында торғанда, браконьерҙар ҡырын эшен атҡара алмаҫ. Фотолар Башҡортостандың Айырыуса һаҡланған тәбиғәт биләмәләре дирекцияһынан алынды.