Сикте һаҡларға әҙерләнегеҙ, егеттәр!

Башҡорт дәүләт аграр университетында 23-сө ике тапҡыр Ҡыҙыл Байраҡлы сик һағы отрядының – 100 йыллыҡ, Ленин һәм Ҡыҙыл Йондоҙ орденлы 95-се Кенигсберг сик буйы отрядының 85 юбилейына арналған “Сик буйында хеҙмәт итеү: бурыс һәм намыҫ” ғилми-ғәмәли конференцияһы үтте. Фәнни-ғәмәли конференцияла ҡатнашыусыларҙы Рәсәй Федераль именлек хеҙмәтенең Башҡортостан Республикаһы буйынса идаралығының кадрҙар бүлеге начальнигы Сергей Кривцов, Дәүләт Йыйылышы – Ҡоролтайҙың комитет рәйесе урынбаҫары Сергей Мережко, Рәсәй Федераль именлек хеҙмәтенең Калининград өлкәһе буйынса сик буйы идаралығының кадрҙар бүлегенең өлкән офицеры Денис Баранов һәм башҡа рәсми вәкилдәр сығыш яһаны. Техник фәндәр кандидаты, доцент, Рәсәй инженер академияһының ағза-корреспонденты, 23-сө сик буйы отряды ветераны Валерий Петряков конференцияның модераторы булды. Башҡорт дәүләт аграр университетының тәрбиә эше һәм йәштәр сәйәсәте буйынса проректоры Рузил Йәғәфәров үҙенең сығышында вузда йәштәрҙе патриотик тәрбиәгә һәм спортҡа ыҡтырыуға ҙур иғтибар бүленеүе тураһында һөйләне. Ул тиҙҙән Совет ғәскәрҙәрен Афғанстандан сығарыуға 35 йыл тулыу уңайынан турнир үтәсәген һәм унда теләгән һәр кемде ҡатнашырға саҡырҙы. Сараның пленар өлөшөндә “Йәштәрҙе патриотик тәрбиәләүҙә уҡыу йорттарының Һәм ветерандар ойошмаларының роле”, “Рәсәй Федерацияһының Федераль именлек хеҙмәтенең Калининград өлкәһе буйынса сик буйы идаралығының Рәсәй Федерацияһы граждандарын сик буйы ғәскәрҙәренә контракт буйынса хеҙмәткә саҡырыу буйынса һөнәри йүнәлеш биреү эше”, “Башҡортостанда тыуған сик һаҡсылары, Советтар Союзы Геройҙары" темалары тикшерелде. Мәғлүм булыуынса, быйылдан Сик буйы ғәскәрҙәренә сроклы хеҙмәткә алыу тергеҙелә, бының өсөн Федераль именлек хеҙмәтенең Башҡортостан буйынса идаралығының кадрҙар бүлегенә, шулай уҡ республика хәрби комиссариатына мөрәжәғәт итергә кәрәк. Семинар рәхмәт хаттары, сувенирҙар тапшырыу менән тамамланды. Һуңынан ҡунаҡтар Башҡорт дәүләт аграр университетының тарих музейында булды. Сарала 14–35 йәшлектәр, Рәсәй Федерацияһы сик буйы ғәскәрҙәре запасы ветерандары һәм хәрбиҙәре, Башҡортостан Республикаһы Башлығы Хакимиәте вәкилдәре ҡатнашты. Ойоштороусылар булып Башҡортостан Республикаһында Сик буйы ғәскәрҙәре запасы ветерандарының һәм хәрбиҙәренең “Сик” (“Граница”) төбәк йәмәғәт ойошмаһы, Башҡорт дәүләт аграр университеты, Башҡортостан Республикаһы Дәүләт именлеге органдары ветерандарының төбәк йәмәғәт ойошмаһы, Рәсәй Федерацияһы именлек органдары ветерандарының гәзите, Калининград өлкәһе буйынса ветерандарҙың “Ветеран янтарных рубежей” гәзите сығыш яһаны. Фәнни-ғәмәли семинар Башҡортостан Республикаһының Йәштәр сәйәсәте буйынса дәүләт комитеты булышлығында уҙғарылды. Рәмилә Мусина фотолары.