“Башҡортостан уҡытыусыһы” матур сара үткәрҙе

Бөгөн, 2 февралдә, “Башҡортостан уҡытыусыһы” журналы былтырғы йыл дауамында Уҡытыусы һәм остаз йылына арнап үткәргән Республика методик һәм ижади эштәр конкурсына йомғаҡ яһаны. Үҙенсәлекле бәйге БР Мәғариф һәм фән финистрлығы, Башҡортостан мәғарифты үҫтереү институты һәм М. Аҡмулла исемендәге Башҡорт дәүләт педагогия университеты ҡатнашлығында ойошторолған. Конкурста республикабыҙҙың төрлө төбәктәренән балалар баҡсалары тәрбиәселәре, мәктәп, урта һөнәри белем биреү, юғары уҡыу йорттары уҡытыусылары, шулай уҡ мәғариф ветерандары ҡатнашҡан. - Конкурсты иғлан иткәндә уның педагогтар йәмәғәтселеге тарафынан шул тиклем ихлас, ҙур әүҙемлек менән ҡабул ителер, тип уйламағайныҡ. Һөҙөмтәләр беҙ көткәндән күпкә яҡшыраҡ булды. Бәйгегә барлығы 416 методик һәм ижади эш ҡабул иттек. Иң яҡшы эштәр, әлбиттә, “Башҡортостан уҡытыусыһы” журналында донъя күрәсәк, - тип билдәләне баҫманың баш мөхәррире Салауат Кәримов. Конкурс “Иң яҡшы дәрес эшкәртмәһе”, “Иң яҡшы кластан тыш сара эшкәртмәһе”, “Уҡытыусы һөнәре тураһында ижади эш” номинациялары буйынса үткәрелгән. Һәр йүнәлеш буйынса иң яҡшы эш авторҙары тип Сибай ҡалаһының “Аҡбуҙат” балалар баҡсаһынан Айгөл Ураҙбаева, Өфө ҡалаһының 21-се лицейы уҡытыусыһы Елена Лиханова һәм Өфө күп профилле һөнәри колледжынан Фәнзил Санъяров табылды. Еңеүселәргә һәм призерҙарға Маҡтау грамотлары, Рәхмәт хаттары, иҫтәлекле бүләктәр тапшырылды. “Башҡортостан уҡытыусыһы” журналы, БР Мәғариф һәм фән финистрлығы, Башҡортостан мәғарифты үҫтереү институты һәм М. Аҡмулла исемендәге Башҡорт дәүләт педагогия университеты үҙҙәренең махсус бүләктәрен булдырған ине. Бүләкләү тантанаһынан һуң педагогтар тәьҫораттары менән ихлас уртаҡлашты. - Үҙебеҙҙең көндәлек эшмәкәрлегебеҙҙә халыҡ ижады өлгөләренә даими таянабыҙ. Шул уҡ ваҡытта заман технологияларынан да баш тартмайбыҙ. Тәүгеһе балаларға дөрөҫ тәрбиә биреү, уларҙың халыҡ педагогикаһы өлгөһөндә рухлы, әҙәпле, илһөйәр итеп тәрбиәләүгә булышлыҡ итһә, яңы технологиялар эшебеҙҙе ҡыҙыҡлыраҡ, мауыҡтырғыс итеп ойошторорға мөмкинлек бирә. Конкурсҡа ебәргән эшемдә лә ошоларға баҫым яһағайным. Һөҙөмтәне белеп ныҡ шатландым. Ошондай бәйгеләр, еңеүҙәр артаьан да тырышып эшләргә дәртләндерә, - тине Өфө ҡалаһындағы 308-се башҡорт балалар баҡсаһы тәрбиәсеһе Земфира Нәүфил ҡыҙы Шәмсетдинова. Конкурста ҡатнашып, алдынғы урындар яулаған барлыҡ педагогтарҙы ла ҡайнар ҡотлап, тынғыһыҙ һәм яуаплы эштәрендә уңыштар теләйбеҙ. Автор фотолары.