“Бер урында ғына торһам, күңелһеҙләнә башлайым”

Бөтә донъя башҡорттары быйыл иғлан иткән Йәштәр йылының төп геройҙары – әүҙем һәм маҡсатлы замандаштар, беҙҙең киләсәк, өмөт һәм таяныс булған йәш быуын вәкилдәре. Бөгөн һеҙҙе тап шундай ҡыҙҙарҙың береһе – М. Аҡмулла исемендәге Башҡорт дәүләт педагогия университетының бишенсе курс студенты Динара Ғәлләмова менән таныштырмаҡсыбыҙ. Ул Әбйәлил районының Рауил ауылында, биш балалы ҙур ғаиләлә үҫкән. - Мәҡсүт һәм Сания Ғәлләмовтарҙың кинйәкәй балалары булам. Татыу ғаиләбеҙҙә бер бөртөк ағайым Мират һәм апайҙарым Венера, Әнүзә, Рита менән бергә тәрбиәләндек. Беҙҙең өйҙә бер ваҡытта ла йыр-моң тынманы. Атайым һыҙҙырып гармунда уйнай, мин дә бәләкәстән йырға маһир булдым, мәктәп йылдарында йыш ҡына сәхнәлә сығыш яһай инем. Бына ошо осҡондар мине ҙур донъяға, юғарыраҡ маҡсаттарға әйҙәгәндер, моғайын. Ҡараусылар күп булғас, балалар баҡсаһына йөрөмәнем, ә туғыҙынсыны бөткәс, Өфө сауҙа-иҡтисад колледжына туризм йүнәлеше буйынса уҡырға индем. Әммә юғары белем алыу тураһында хыяллана инем. Шуға ла колледжды “ҡыҙыл диплом”ға тамамлағас, М. Аҡмулла исемендәге БДПУ-ның башҡорт филологияһы факультетына документтарымды тапшырҙым. Һөнәрем буйынса буласаҡ башҡорт теле һәм әҙәбиәте, инглиз теле уҡытыусыһымын. Әлеге ваҡытта Әбйәлил йәштәре ойошмаһының урынбаҫары вазифаһын башҡарам, баш ҡалала яҡташтарыбыҙ менән төрлө проекттарҙы тормошҡа ашырабыҙ. Мәҫәлән, күптән түгел тыуған районыбыҙҙағы “Ирәндек” лагерына барып ярҙам күрһәтеп ҡайттыҡ. Эш шунда, йыл һайын район хакимиәте ҡышҡы каникулдарҙа ауыр тормош хәленә тарыған балалар һәм үҫмерҙәр өсөн ял ойоштора. Беҙ ҙә уларға иғтибар күрһәтергә ниәтләнек, бәләкәй генә байрам ойошторҙоҡ, бүләктәр тараттыҡ. Бала саҡта шиғырҙар яҙып, "Йәншишмә" гәзитенең "йәш хәбәрсеһе” исемен алһам, хәҙер социаль селтәрҙәрҙә шәхси блог алып барам – был да минең өсөн ифрат ҡыҙыҡлы, күп яҡлы йүнәлеш. Интернеттың мөмкинлеге һанап бөткөһөҙ: бында үҙ тормошоңдо күрһәтеүҙән бигерәк, милли контент эшләргә, туған башҡорт телебеҙҙе, мәҙәниәтебеҙҙе үҫтереүгә арналған акциялар ойоштороп, уларҙы ҡуйырға мөмкин. Рус йырҙарын башҡортсаға тәржемә итәм, үҙем дә башҡарам. Яңыраҡ ике йырым сыҡты: "Тик һин" һәм "Ҡанаттарым булһа әгәр" тип атала. Ыңғай фекерҙәр күп булды, был да миңә ижади ҡомар өҫтәй. Яңыраҡ Башҡорт телен үҫтереү һәм һаҡлау ойошмаһы үткәргән гранттар конкурсында еңеп, хәҙер баш ҡала мәктәптәрендә "ЙырАлыш" музыкаль уйынын үткәреп йөрөйбөҙ. Проект “Көйҙө таны” билдәле уйынына оҡшаш, тик ул башҡорт телендә үтә. Уйын ике этапта уҙғарыла: заманса йырҙар һәм боронғо башҡорт халыҡ йырҙарына бағышланған. Проект халыҡ йырҙарын һаҡлауға, популярлаштырыуға һәм танытыуға йүнәлтелгән. Йәмәғәт эштәрендә әүҙем ҡатнашһам да, уҡыуым тәүге урында. Былтыр уҡыуҙағы һәм фәнни эшмәкәрлектәге юғары һөҙөмтәләр өсөн республика Башлығы Радий Хәбировтың стипендияһына лайыҡ булдым. Һәр саҡ эҙләнеүҙәр юлында булырға яратам. Бер урында ғына торһам, бер үк эште башҡарһам, күңелһеҙләнә башлайым, яңылыҡ эҙләйем. Әлегә мин йәшмен, аныҡ ҡына тормош юлым да һайланмаған, шуға ла һәр яҡлап үҙемде һынап ҡарау, үҫешеү, тәжрибә туплау оҡшай, төрлө кешеләр менән танышыу, хеҙмәттәшлек итеү ҙә дәрт-дарман өҫтәй. Атай-әсәйемә бала саҡтан миңә азатлыҡ биреүҙәре, һәр саҡ терәк-таяныс булыуҙары өсөн рәхмәтлемен. Бала саҡтан йөрәгем нимә ҡуша, шуны эшләйем һәм бәхетлемен. Яҡындарым иһә нимә эшләһәм дә, ҡайҙа булһам да, гел изге теләктәрен теләп, фатиха биреп тора. Бөгөнгө йәштәр – әүҙем дә, маҡсатлы ла, рухлы ла. Артабан да Өфөлә яҡташтарымды берләштереп, ҡыҙыҡлы проекттар ойошторғом килә. Тыуған яҡыбыҙ алыҫ, шуға ла беҙ татыу булырға, кәрәк саҡта бер-беребеҙгә ярҙам итергә тейеш, минеңсә. Йәштәр бер - береһе менән башҡорт телендә аралашһын, насар юлға тайпылмаһын, шәхси йәһәттән үҫешһен, тигән маҡсаттар ҡуйылған ойошмала. Шуға ла беҙҙең хәрәкәткә ҡушылған һәр кемде хуплайбыҙ, улар үҙҙәре өсөн төрлө мөмкинлектәр асыр, тип ышанабыҙ, - тип билдәләй Динара Ғәлләмова. Г. БАЛТАБАЕВА. Фотолар геройҙың шәхси архивынан.