“Рәсәй Федерацияһы граждандарына патриотик тәрбиә биреү” федераль проекты сиктәрендә Ишембай ҡалаһындағы Әхмәтзәки Вәлиди исемендәге 2-се башҡорт гимназия-интернатында Шайморатов кластары эшләй. Уның тәүгеһе 2022-23 уҡыу йылында барлыҡҡа килгән, улар Аделина Ғәлиева етәкселегендәге VI А класы уҡыусылары. Әлеге уҡыу йылында йәнә бер шайморатовсылар класы асылған. Зөһрә Сәфәрғолова ошо абруйлы исемде йөрөткән VБ класы уҡыусыларының класс етәксеһе. Һәр шайморатовсылар класының хәрби кураторы һәм тәрбиәсеһе лә бар. –Шайморатовсылар класының уҡыу планы төп һәм дөйөм урта белем биреү программаларын үҙләштереүҙе генә маҡсат итеп ҡуймай, ил тарихына хөрмәт, илһөйәрлек, Тыуған ил, республика өсөн ғорурлыҡ тәрбиәләү ҙә иғтибар үҙәгендә. Был йәһәттән 112-се Башҡорт кавалерия дивизияһы яугирҙәре батырлығын йәш быуынға өлгө итеп ҡуябыҙ. Шулай уҡ балаларҙы рухи-әхлаҡи яҡтан үҫтереүгә, сәләмәт тормош алып барыуға өндәүгә лә айырым иғтибар бирелә,–ти 2-се гимназия-интернаты директоры Ләлә Шәрипова. Көндөң тәүге яртыһында балалар мәктәптең база предметтарын уҡый, Рәсәй тарихын, республиканың дәүләт телдәрен, физика, математика һәм башҡа профиль фәндәрҙе тәрән өйрәнә. Көндөң икенсе яртыһы ла тығыҙ үтә. Дөйөм физик әҙерлек буйынса факультативтарға йөрөйҙәр, үҙеңде һаҡлауға, саф әҙерлек нигеҙҙәренә, традицион йәйәнән атыу, умартасылыҡ, атта һыбай йөрөү серҙәренә өйрәнәләр. Бейеү, йөҙөү кеүек оҫталыҡтарға ла эйә шайморатовсылар. Шулай уҡ Ҡытай телен дә ҡыҙыҡһынып үҙләштерәләр. Аҙна һайын экскурсияларға йөрөү, ҡыҙыҡлы кешеләр менән осрашыу ҙа уларға төрлө яҡлап үҫеүгә булышлыҡ итә. Шайморатовсылар класында уҡыусылар мәктәп, ҡала һәм республика сараларында, олимпиадаларҙа , конкурстарҙа, спорт ярыштарында ҡатнаша һәм алдынғы урындарҙы яулай. Шайморатовсыларҙың берҙәм формалары ла бар. Был уларҙы башҡа кластарҙан айырып тора. Иң мөһиме – үҙҙәренең уҡыуы, тәртибе, илһөйәр булыуҙары менән улар үрнәк күрһәтә. Фото: 2-се башҡорт гимназия-интернаты архивынан.