Уҡыусылар уңайлы мөхит һәм үҫеш яҡлы

Ейәнсура районының Ишемғол ауылы урта дөйөм белем биреү мәктәбе уҡыусылары “Мәктәп инициативалы бюджетлауы” программаһына ярашлы үткәрелгән конкурста ҡатнаша. 9 ғинуарҙа Уҡыусылар советында мәктәптәге белем биреү мөхитен уңайлыраҡ итеүҙе маҡсат итеп ҡуйған биш проект һайлап алынған. Улар: - “Мәктәптә музыкаль-үҫеш мөхитен булдырыу” – 9-сы кластың проекты (етәксеһе Р.В. Ҡотлогилдина, капитан Р. Түләбаева); - "Көслө һәм сәләмәт булып үҫәбеҙ" – тренажер залы – 8-се кластың проекты (етәксеһе Л.И. Бакирова, капитан А. Ғөбәйҙуллин); - “Воркаут майҙансығы – һаулыҡ биләмәһе” – 9-сы класс (етәксеһе М.Д. Латипова, капитан Д. Гайсин); - “Интерактив панель менән уҡыйбыҙ” – 10-сы класс, (етәксеһе В.Ю. Бакирова, капитан А. Абдулманов); - “Спорт майҙансығын төҙөкләндереү, йүгереү юлын яҡшыртыу” – 11-се класс (етәксеһе В.Ю. Бакирова, капитан Р. Мусина). “Балалар проекттарҙы тормошҡа ашырыу хаҡын иҫәпләп сығарҙы, мәғлүмәт һәм агитация кампаниялары әҙерләне, мәктәп коллективы алдында үҙ проекттарын яҡланы. 17 ғинуарҙа тауыш биреү үтте. Күпселек тауыш менән 9-сы класты проекты иң яҡшыһы тип табылды. Уҡыусылар фекеренсә, уларҙың аудитория алдында йыр менән сығыш яһарға, инструменттарҙа уйнарға өйрәнергә теләктәре ҙур. Бының өсөн микшер пульты, микрофондар менән йыһазландырылған урын кәрәк. Сараларҙы ҡыҙыҡлыраҡ, сағыуыраҡ итеп ойоштороу өсөн барабансылар оркестрын ойошторорға мөмкин, тигән тәҡдимдәр ҙә булды. Ата-әсәләр ҙә балалары өсөн музыкаль үҫеш урыны булдырыу идеяһын хуплай. Улар был проектты финанслауҙа ҡатнашасаҡ”, - тип һөйләне Ишемғол ауылы мәктәбенең инициативалы төркөмө ағзаһы З.Р. Фәйзуллина. Уҡыусыларға матур башланғыстарында уңыштар теләйбеҙ. Йәш быуынды төрлө яҡлап үҫтереү, улар араһынан лидерҙар тәрбиәләү ил Президенты Владимир Путиндың май указдары тарафынан раҫланған “Мәғариф” милли проекты (национальный проект “Образование”) ҡуйған ҡарарҙарҙы тормошҡа ашырыуға ла булышлыҡ итә. Фото: Ишемғол ауылы мәктәбенән.