Мәскәүҙә уҙған “Атайсал – Рәсәй көсө” Бөтә Рәсәй муниципаль форумында Владимир Путин ҡала мөхитен үҫтереү өлкәһендә иң яҡшы проекттарҙы билдәләүсе конкурстың 2030 йылға тиклем оҙайтылыуы хаҡында хәбәр итте. Бөтә Рәсәй уңайлы ҡала мөхитен булдырыу өсөн иң яҡшы проекттар конкурсы “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проектына индерелгән. – Күп эштәр башҡарылды, башҡараһы эштәр байтаҡ. Әммә күп кенә яҡшы, файҙалы башланғыстар уңайлы ҡала мөхитен булдырыусы иң яҡшы проекттарҙың Бөтә Рәсәй конкурсы арҡаһында әҙерләнде. Уны 2030 йылға тиклем оҙайтыу тураһында ҡарар ҡабул ителгән дә инде, – тине Владимир Путин. Башҡортостандың бәләкәй ҡалалары һәм тарихи биләмәләре тәүге тапҡыр 2019 йылда Бөтә Рәсәй уңайлы ҡала мөхитен булдырыу өсөн иң яҡшы проекттар конкурсында ҡатнашты. 2019 йылдан конкурста республика тәҡдим иткән 29 проект еңеп сыҡты. Уларҙы тормошҡа ашырыуға федераль бюджеттан йәлеп ителгән аҡсаның дөйөм күләме 2 миллиард 480 миллион һум тәшкил итә. – Артабан да был конкурста ҡатнашырға, киләһе этапҡа заявкалар әҙерләргә кәрәк. Тәү сиратта был мәсьәлә менән муниципалитет етәкселәре ҡыҙыҡһынырға тейеш. Бының менән шөғөлләнгән башлыҡтар ҡалаларыбыҙҙың һәм ауылдарыбыҙҙың үҙгәреүен күрә, – тине Башҡортостан Башлығы Радий Хәбиров. 2023 йылда Стәрлетамаҡта, Баймаҡта, Бәләбәйҙә, Бөрөлә, Күмертауҙа, Межгорьела конкурста еңеүсе алты проектты ғәмәлгә ашырыуҙы тамамланылар. Ағиҙелдә, Дүртөйлөлә, Ишембайҙа, Мәләүездә, Яңауылда тағы ла биш проектты тормошҡа ашыра башланылар, уларҙы 2024 йылдың 1 июленә тиклем тамамлау күҙаллана. Быйыл Баймаҡта һәм Ишембай районының Верхотор ауылында ике конкурс биләмәһен төҙөкләндереү башлана. - Беҙ артабан да алға барырға ниәтләйбеҙ һәм төбәгебеҙ Рәсәйҙә иң яҡшы төбәк булһын өсөн эшләйбеҙ. Йәшәүе һәм эшләүе уңайлы булған республикабыҙға кешеләр ҡунаҡтарын ғорурланып саҡырасаҡ, – тине Башҡортостан Республикаһының торлаҡ-коммуналь хужалыҡ министры Ирина Голованова.