Асҡын районы хакимиәте башлығы Динис Йосопов ошо көндәрҙә Мәскәүҙә үткән «Кесе ватан — Рәсәйҙең көсө» форумында ҡатнашты. Эш сәфәренән тәьҫораттары менән ул социаль селтәрҙәрҙәге сәхифәһендә уртаҡлашты. “Форум сиктәрендә 2023 йылда Бөтә Рәсәй конкурсының иң яҡшы муниципаль практикаһы еңеүселәрен бүләкләү тантанаһы үтте. «Муниципаль берәмектәрҙә йәшәүселәр менән бәйләнеш булдырыу» номинацияһында Ҡашҡа ауыл биләмәһе өсөнсө урынды яуланы. Награданы ауыл хакимиәте башлығы Ринат Ғәләүетдиновҡа Рәсәй Федерацияһының иҡтисади үҫеш министры Максим Решетников тапшырҙы. Яңы йыл алдынан Ҡашҡа ауыл биләмәһе «Башҡортостан Республикаһының иң яҡшы муниципаль берәмеге» төбәк конкурсында өсөнсө урынға лайыҡ булғайны. Яҡташтарымды лайыҡлы бүләк менән ҡотлайым", - тип яҙған Динис Йосопов. Форумдан һуң район хакимиәте башлығы Мәскәү дауаханаларының береһендә дауаланған туғыҙ йәшлек Гөлнара Зарипованың хәлен белеп сыҡҡан. Гөлнара әсәһе Альбина менән бергә яман шешкә ҡаршы көрәшә. Күптән түгел уға операция яһағандар. “Гөлнара өсөн бөтә Асҡын халҡы борсола. Ҡулдан килгәнсе ярҙам иттек. Батыр ҡыҙыҡай был ауырыуҙы еңер тип ышанабыҙ. Ярҙам итергә теләүселәр булһа, түбәндәге һылтанмаға баҫығыҙ: https://vk.com/askino_bashkortostan?w=wall-145517725_16103%2Fall” – тип яҙа Динис Йосопов. Фотолар Денис Йосоповтың социаль селтәрҙәге сәхифәһенән алынды.