Ҡала юбилейына ҙур спорт үҙәктәре төҙөлә

16 ғинуарҙа Республикаға идара итеү үҙәгендә Башҡортостан Башлығы Радий Хәбиров Өфөнөң 450 йыллығын байрам итеүгә әҙерлек буйынса сираттағы эш кәңәшмәһен үткәрҙе, ул 2024 йылда билдәләнәсәк. Профилле министрлыҡтар һәм ведомстволар етәкселәре ҡала хакимиәте һәм подряд ойошмалары вәкилдәре менән берлектә республиканың баш ҡалаһында төп юбилей объекттарын төҙөү барышын тикшерҙе. Иң ҙур төҙөлөштәрҙең береһе – Өфөнөң Октябрь районында Көрәш һарайы. Уның төҙөлөшө раҫланған график буйынса бара. 2024 йылдың октябрендә бында “Рәсәй – спорт державаһы” халыҡ-ара форумының төп сараларын үткәрергә планлаштыралар. Хәтерегеҙгә төшөрәбеҙ, 2023 йылдың октябрендә Рәсәй Президенты Владимир Путин Башҡортостанда ошо ҙур сараны уҙғарыу тураһында иғлан итте. Параллель рәүештә Көрәш һарайына яҡын территорияны төҙөкләндереү һәм үҫтереү дауам итә. Атап әйткәндә, Рәсәй православие сиркәүенең Башҡортостан митрополияһы менән берлектә Изге Кирилл һәм Мефодий сиркәүенең фасадын яңыртыу, шулай уҡ Глумилин-2 биҫтәһендә дәүләт-шәхси уҙаҡташлыҡ шарттарында 1 225 урынлыҡ мәктәп төҙөлөшөн тамамлау планлаштырыла. Өфөнөң төньяҡ һәм көнсығыш өлөшөндә лә ҡала юбилейына ҙур спорт үҙәктәре төҙөлә, улар халыҡ-ара һәм федераль кимәлдәге ярыштарҙы уҙғарыу майҙансығына әүереләсәк. Мәҫәлән, Инорста Ишкәкле слалом комплексы төҙөлә, уның беренсе сираты 2024 йылда тапшырыла. Май – июнь айҙарында бында Бөтә Рәсәй һынау ярыштары үтәсәк, ә көҙөн “Рәсәй – спорт державаһы” халыҡ-ара форумы сиктәрендә федераль финанслауҙы йәлеп итеп, комплекстың икенсе сиратын төҙөүгә старт биреләсәк. Ә Затонда быйыл октябргә Рәмил Әйүпов исемендәге фехтование үҙәге буйынса эштәрҙе тамамларға һәм унда “Рәсәй – спорт державаһы” форумына арналған халыҡ-ара турнир үткәрергә планлаштыралар. Кәңәшмәлә яңы спорт объектына инеү юлы төҙөлөшө тикшерелде. Башҡортостан Башлығы республиканың Транспорт министрлығына Өфө хакимиәте менән берлектә был мәсьәләне тикшерергә ҡушты. Радий Хәбиров шулай уҡ 2024 йылдың беренсе кварталында төҙөлөш эштәрен тамамларға һәм Өфөнөң Октябрь районы Нуғай ауылында сменаһына 320 кешегә иҫәпләнгән поликлиника асырға ҡушты. *** Өфөнөң 450 йыллығына әҙерлектең мөһим йүнәлеше – күләмле инфраструктура проекттарын тормошҡа ашырыу. Шуларҙың береһе – “Көньяҡ ҡапҡа” ҡоролмалар комплексын төҙөү. Беренсе этап сиктәрендә ҡаланың Киров районында Пугачев урамын реконструкциялайҙар һәм генерал Рыленко урамы киҫелешендә транспорт сиселеше төҙөйҙәр. Өфө хакимиәтенең Юлдар һәм яһалма ҡоролмалар төҙөү, ремонтлау идаралығы начальнигы Константин Паппе хәбәр итеүенсә, төҙөүселәр раҫланған график буйынса эшләй. Бельская урамынан Бородинская урамына тиклемге участкала түшәү һәм инженер селтәрҙәре ҡоролошо дауам итә. Реконструкциянан һуң хәрәкәтте быйыл көҙгә тиклем асыу планлаштырыла. Башҡортостан Башлығы Радий Хәбиров ҡала хакимиәтенә Пугачев урамына терәлеп ятҡан биләмәне комплекслы төҙөкләндерергә ҡушты. Өфөгә көньяҡтан инеү урынында Ағиҙел йылғаһы аша 1956 йылда төҙөлгән аркалы автомобиль күперен реконструкциялау дауам итә. Төҙөүселәр иҫке металл конструкцияларҙың күп өлөшөн һүтеп алған, күпер ҡоролмаһының яңы элементтарын әҙерләй. Республика Башлығы Дим сиселеше районында ландшафт композицияһын яңыртыу кәрәклегенә иғтибар итте. Өфөнөң 450 йыллығына әҙерлек буйынса үткән кәңәшмәләрҙең береһендә ошо объекттың планлаштырылған ҡарарын раҫланылар. *** Ҡаланың юбилейы алдынан йәмәғәт киңлектәрен һәм биләмәләрен төҙөкләндереү буйынса ҙур күләмдә эштәр башҡарыласаҡ. Өфө хакимиәте башлығының беренсе урынбаҫары Сергей Кожевников, комплекслы яңыртыу тарихи үҙәктең биш “ҡунаҡ” урамына – Ленин, Карл Маркс, Пушкин, Коммунистик һәм Яңы күпер урамдарына ҡағыласаҡ, тип хәбәр итте. Биналарҙың фасадтарын, тротуарҙарҙы, урамдарҙы яҡтыртыуҙы, адрес таҡталарын һәм реклама алтаҡталарын яңыртыу “Инештәргә ҡайтыу” дөйөм концепцияһы сиктәрендә башҡарыласаҡ. Тағы ла бер комплекслы проект – Октябрь Революцияһы урамын реконструкциялау һәм велосипедта йөрөү зонаһын һәм ҡунаҡтарҙы йәлеп итеү урындарын булдырыу. 2024 йыл башына төҙөүселәр проекттың беренсе этабын тамамлаясаҡ, инженер селтәрҙәрен һәм автотранспорт өсөн ике һыҙатлы юл өлөшөн йыһазландырасаҡ. Икенсе этап йорттарҙы реставрациялауҙы һәм эргә-тирәләге биләмәләрҙе төҙөкләндереүҙе күҙ уңында тота. *** Эш тамамланғас, Башҡортостан Башлығы Радий Хәбиров Өфө хакимиәтенә, министрлыҡтарға һәм ведомстволарға республиканың баш ҡалаһының юбилейына арналған ваҡиғалар планын-графигын әҙерләргә ҡушты. – Төп объекттар буйынса эштәрҙең график буйынса барыуын күрәбеҙ. Киләһе кәңәшмәлә Өфөнөң 450 йыллығына арналған саралар – фестивалдәр, форумдар, күргәҙмәләр, спорт ярыштары исемлеген тикшерәсәкбеҙ. Беҙҙең бурыс – баш ҡала халҡы һәм ҡунаҡтары өсөн аныҡ ваҡиға календарын булдырыу, – тип йомғаҡ яһаны Радий Хәбиров. Фото һәм мәғлүмәт сығанағы: glavarb.ru.