Һеҙҙе Өфө фән һәм технологиялар университетының Сибай институтында белем алған өлгөр ҡыҙ Гөлкәй Исхаҡова менән таныштырмаҡсыбыҙ. Ул педагогика факультетының рус, башҡорт һәм сит телдәр кафедраһының 4-се курс студенты. Ҡыҙҙың буласаҡ төп һөнәре – инглиз һәм немец телдәре уҡытыусыһы. Гөлкәй сығышы менән Сибай ҡалаһынан. Рамазан Өмөтбаев исемендәге башҡорт лицейын тамамлаған ҡыҙ бәләкәйҙән инглиз телен өйрәнә. Телдәргә һөйөү әсәһе, филология фәндәре кандидаты, Сибай институты доценты Рәзилә Рәмил ҡыҙынан киләлер. Шуға күрә мәктәпте тамамлағас та уның алдына ниндәй һөнәр һайларға тигән һорау тормай. Әсәһе уҡытҡан Сибай институтына уҡырға инә. Тик “бишле” билдәләренә генә өлгәшкән Гөлкәй белем алыуҙан тыш фән, әҙәбиәт һәм музыка менән дә төплө шөғөлләнергә ваҡыт таба. Институт һәм ҡала кимәлендә генә түгел, республика, Рәсәй һәм халыҡ-ара сараларҙа, олимпиада һәм конкурстарҙа ла ҡатнашып, юғары урындарҙы яулай, инглиз телендә үткән төрлө сара–бәйгеләрҙә әүҙем ҡатнаша. Әйткәндәй, Гөлкәйҙең фән менән мауығыуы мәктәп йылдарында уҡ башлана. Тәүге мәҡәләһе етенсе класта уҡыған саҡта ғилми эштәр йыйынтығында донъя күрә. Әлеге көндә ҡулына диплом да алып өлгөрмәгән ҡыҙ–утыҙлаған ғилми мәҡәлә авторы. Гөлкәйҙең күңеленә ятҡан тағы ла бер шөғөл бар – ул да булһа музыка. Ул беренсе кластан йыр түңәрәгендә шөғөлләнә, артабан музыка мәктәбендә вокал дәрестәрен үҙләштерә. Сибай институтытында Гөлкәй Исхаҡова вокал ансамбленең солистарының береһе. Институт һәм ҡала кимәлендә үткән сараларҙа башҡорт, урыҫ, инглиз һәм француз телдәрендә сығыш яһаған Гөлкәй Исхаҡованы күптән инде тамашасылар яратып та өлгөргән. Моңло тауышы, үҙенсәлекле моңо менән сығыш яһаған ҡыҙ йыл һайын Сибай институты студенттары араһында уҙғарылған «Студент яҙы» фестивалендә призлы урындар яулай. Ә үҙенең иң ҙур ҡаҙанышы тип –Республика Башлығы стипендияһына лайыҡ булыуын иҫәпләй ҡыҙ. Шулай уҡ Гөлкәй Сибай ҡалаһының моделдәр агентствоһында шөғөлләнә. Ҡала кимәлендә үткән төрлө сараларҙа һәм бәйгеләрҙә ситтән килгән ҡунаҡтарҙы башҡорт рухында ҡаршылау ғына түгел, подиумдарҙа башҡорт халҡының милли кейемен, биҙәнеү әйберҙәрен күрһәтеү һәм киләсәктә халҡыбыҙҙың милли колоритын юғарыраҡ кимәлдәргә күтәреүҙе маҡсат итеп ҡуя үҙ теленә, үҙ иленә ғашиҡ ҡыҙ. Бына шундай сит телдәр өйрәнгән, үҙ теленә тоғро ҡалған, йыр-моңға ғашиҡ, киләсәккә ҙур маҡсаттар ҡуйып, сит илдәр гиҙергә хыялланған маҡсатлы, креатив һәм бар яҡлап та алдынғы һәм уңышлы, тырыш ҡыҙға киләсәктә барлыҡ хыялдарының да тормошҡа ашыуын теләйбеҙ! Уңыштар һиңә. Фотолар шәхси архивтан һәм Кәримә Усманованыҡы.