Бер юлы ике аппарат алынды

Нуриман үҙәк район дауаханаһына бер юлы ике ультратауыш аппараты алынды. Береһен поликлиниканың ҡатын-ҡыҙҙар консультацияһына урынлаштырҙылар. Уның ярҙамында ҡатын-ҡыҙҙарҙың репродуктив системаһы органдары сәләмәтлеген тикшерәсәктәр, төрлө патологияларҙы асыҡлаясаҡтар. – Яңы ультратауыш аппараты алыу район дауаханаһы өсөн ҙур әһәмиәткә эйә. Ул табиптың эшен еңеләйтеүсе бөтә заманса функцияларға һәм мөмкинлектәргә эйә. Алынған һүрәттәрҙең асыҡ булыуы ағзаларҙағы аҙ ғына үҙгәрештәрҙе лә күрергә, теүәл диагноз ҡуйырға, дөрөҫ дауа тәғәйенләргә ярҙам итә, – ти акушер-гинеколог Зинара Фәттәхова. Аппараттарҙың икенсеһе поликлиникаға ҡуйылған. Уның ярҙамында Красная Горка ауылы халҡы ваҡытында тикшереү үтә ала, хәҙер ҡалаға йөрөүҙең кәрәге юҡ. Ошонда уҡ квалификациялы медицина ярҙам алыу мөмкинлеге бар. Хәтерегеҙгә төшөрәбеҙ, әлеге ваҡытта ультратауыш тикшереүе - иң популяр медицина диагностикаһы ысулдарының береһе. Рәсәй Президенты Владимир Путиндың “май" указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение") төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, ямаш шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.