Башҡортостан йәнә беренсе

2024 йылда Башҡортостан социаль йүнәлешле коммерцияға ҡарамаған ойошмаларға ярҙам күрһәтеү өсөн Рәсәй Президенты гранттары күләме буйынса илдең алдынғы төбәктәре иҫәбенә инде. Башҡортостан Башлығы Радий Хәбиров аҙналыҡ оператив кәңәшмә барышында ошо хаҡта хәбәр итте. Хәтерегеҙгә төшөрәбеҙ, 12 ғинуарҙа Рәсәй Президенты Хакимиәте етәксеһенең беренсе урынбаҫары Сергей Кириенко граждандар йәмғиәтен үҫтереү өсөн дәүләт башлығы гранттарын тапшырыу буйынса координация комитеты ултырышын үткәрҙе. Конкурсҡа йомғаҡ яһалды, унда ҡатнашыуға ғаризалар 2023 йылдың көҙөндә ҡабул ителгәйне. Төбәктәрҙән бөтәһе 10 827 йәмәғәт башланғысы ҡаралды. Конкурста илдең 1 559 социаль йүнәлештәге коммерцияға ҡарамаған ойошмаһы еңеүсе булды. Ошо проекттарҙы тормошҡа ашырыуға Президент гранттары фонды 4,4 миллиард һум бүлә. Башҡортостанда дөйөм хаҡы 65,8 миллион һумлыҡ 46 башланғыс Рәсәй Президенты грантына лайыҡ булды. Шулай уҡ республика төбәк конкурсын финанслауға ил төбәктәре араһында иң ҙур сумма – 90,3 миллион һум алды. – Һуңғы дүрт йылда Башҡортостан республика Башлығы гранттары фонды өсөн федераль бюджеттан 364,8 миллион һум йәлеп итте, – тине Радий Хәбиров. – 2023 йылда республика грант конкурсына булышлыҡ итеүгә төбәк ҡаҙнаһынан – 220 миллион һум, ә 2024 йылда 280 миллион һум бүленде. Был – ошо өлкәгә иң ҙур бюджет һалыуҙарының береһе. Башҡортостан Башлығы республикала граждандар башланғыстарына булышлыҡ итеү менән шөғөлләнгән автономлы коммерцияға ҡарамаған ойошмаларҙың һәм компанияларҙың әүҙем эшмәкәрлеген билдәләне. Радий Хәбиров шулай уҡ республика Башлығы гранттарының төбәк операторына һөҙөмтәле эшләгәне өсөн рәхмәт әйтте. – Башҡортостандың йыл һайын беренсе урындар яулауы – ул, тәү сиратта, тормошҡа ашырылған проекттарҙы баһалау һөҙөмтәләре һәм уларҙан алынған социаль һөҙөмтәләр буйынса республикаға күрһәткән ышаныс, – тип йомғаҡ яһаны Радий Хәбиров. Фото: Башҡортостан Башлығы сайты.