Радий Хәбиров хосписта тәрбиәләнеүселәрҙе Иҫке Яңы йыл менән ҡотланы

13 ғинуарҙа Башҡортостан Башлығы Радий Хәбиров Өфө хосписында булды, учреждениелағы тәрбиәләнеүселәрҙе Иҫке Яңы йыл менән ҡотланы һәм бүләктәр тапшырҙы. Ундағы ололар һәм балалар өсөн әкиәт геройҙары менән берлектә байрам сараһы ойошторолдо. Радий Хәбиров хоспис бинаһын ҡараны, медицина хеҙмәткәрҙәре һәм унда тәрбиәләнеүселәр менән аралашты. Учреждениеның баш табибы Оксана Кузовкина белдереүенсә, балалар блогындағы бүлмәләрҙә килеп йөрөүсе ата-әсәләр өсөн өҫтәмә карауаттар ҡуйылған. Бәләкәстәрҙең ата-әсәһе республика етәксеһенә ошондай урын барлыҡҡа килеүе өсөн рәхмәт белдерҙе. Улар бында өйҙәренә кеүек килеп йөрөй. Бында яҡшы мөхит хөкөм һөрә, табиптар һәм персонал үҙ яҡындарына кеүек мөнәсәбәттә. Өфө хосписында Туймазы районының Серафимовка балалар йорто-интернаты тәрбиәләнеүселәренә 21 көнлөк тикшерелеү һәм дауаланыу ойошторолған. Башҡортостан Башлығы бында хәстәрлек күргән ололар менән дә аралашты. Улар араһында МХО-ла ҡатнашыусының инсульт кисергән әсәһе лә бар. Радий Хәбиров уның улының ҡайҙа хеҙмәт итеүе менән ҡыҙыҡһынып, тиҙерәк еңеү менән ҡайтыуын теләне. “Өфө хосписы” мәрхәмәтлек фондының попечителдәр советы рәйесе Каринэ Хәбирова билдәләүенсә, был учреждениеның булыуы тәрбиәләнеүселәрҙең яҡындарына һәм туғандарына ял итеү форсаты бирә. Иҫегеҙгә төшөрәбеҙ: Өфө хосписы 2023 йылдың йәйендә асылды. Уны Рәсәй Федерация Советы Рәйесе Валентина Матвиенко һәм Башҡортостан Башлығы Радий Хәбиров асты. Был - ололарға һәм балаларға махсус паллиатив ярҙам күрһәтеү өсөн төҙөлгән илдә берҙән-бер учреждение. Объект Өфөнөң көньяҡ өлөшөндә урынлашҡан, дөйөм майҙаны – 13 мең кв.м. Стационар 60 урынға иҫәпләнгән, шуның 20-һе – балалар өсөн. Бүлмәләрҙә - заманса мебель һәм ҡорамалдар, хәрәкәте сикләнгәндәр өсөн дә уңайлы. Бассейн, процедура кабинеттары, дарыухана, ял бүлмәләре, балалар өсөн уйын һәм табыныу бүлмәләре бар. Учреждение биләмәһендә йәйәү йөрөү өсөн зоналар, балаларға уңайлы майҙансыҡтар булдырылған. Хоспис базаһында БДМУ, Өфө медколледжы, республика Һаулыҡ һаҡлау министрлығының квалификацияны күтәреү үҙәге студенттарын паллиатив ярҙам күрһәтеү өлкәһендә әҙерләү өсөн уҡыу комплексы ойошторолған. Мәғлүмәт һәм фото: https://glavarb.ru/rus/press_serv/novosti/173990.html