Башҡортостан Хөкүмәте Премьер-министры Андрей Назаров социаль селтәрҙәге шәхси сәхифәһендә Рәсәй журналистикаһы көнөнә бәйле түбәндәге фекерҙәре менән бүлешкән. “13 ғинуар - Рәсәй журналистикаһы өсөн тарихи дата. Был көндө 1703 йылда Петр I указы менән «Ведомости» гәзитенең тәүге һаны сыға. Хәҙерге киң мәғлүмәт саралары - ул матбуғат баҫмалары ғына түгел, ә күп миллионлы аудиторияһы булған заманса гәзит-журналдарҙы, интернет-ресурстарҙы, телерадиокомпанияларҙы берләштергән медиахолдингтар. Әммә береһе үҙгәрешһеҙ ҡала - сифатлы журналистикаға ихтыяж ҙур. Бөгөн социаль селтәрҙәр, мәғлүмәт һуғыштары һәм фейктар быуатында беҙгә игенде кәбәгенән айырырға, ысын хәл-ваҡиғаларҙы күрергә булышлыҡ итә. Республиканың киң мәғлүмәт өлкәһендә 3 мең самаһы журналист эшләй. Башҡортостанда урындағы бөтә, шул иҫәптән милли телдәге баҫмаларҙы һаҡлап ҡалып, тиражды тотороҡландырыуға өлгәшелде. Был көндө журналистың ролен билдәләгем килә - алдынғы ваҡиғаларҙа булыу, мәғлүмәти көн тәртибен биреү, йәмғиәтте уйлатырға һәм үҙ ҡарашын белдерергә мәжбүр итеү. Тамашасы һәм уҡыусы алдындағы яуаплылыҡ сараһын аңлаған, һөнәри бурысын намыҫлы үтәгән кешеләрҙең һәммәһенә лә рәхмәт белдерәм. Хәҙерге журналистикала айырым категория - хәрби корреспонденттар. Беҙҙең егеттәр башҡорт яугирҙәренең батырлыҡтары тураһында бәйән итеү, МХО-нан дөрөҫ һәм ышаныслы мәғлүмәт биреү өсөн ҡыйыу рәүештә махсус хәрби операция зонаһына юллана. Медиаөлкә хеҙмәткәрҙәрен һәм ветерандарын Рәсәй матбуғаты көнө менән ҡотлайым. Һеҙгә ныҡлы һаулыҡ, бөтмәҫ илһам, сағыу геройҙар һәм рәхмәтле аудитория теләйем”, -тип яҙған Премьер-министр. Фото: Андрей Назаровтың шәхси сәхифәһенән.