Республика етәксеһе Туймазы районы фельдшерҙары тураһында яҙҙы. “Һоҡланғыс кешеләр тормошо” (ЖЗЛ) рубрикаһында төрлө йәштәге һөнәр эйәләре, төрлө мауығыуҙары булған шәхестәр хаҡында һөйләйбеҙ. Башҡортостан Башлығы Радий Хәбиров сираттағы пост яҙған. Унда шулай тиелә: “Беҙҙең фельдшер-акушерлыҡ пункттарында йәш табиптарҙың да эшләүе бик ҡыуаныслы. Туймазы районы Төмәнәк ауылынан фельдшерҙар Зөлфирә Ғибәҙуллина һәм Регина Шакирова менән эш сәфәрҙәренең береһендә таныштым. Зөлфирә Миҙәхәт ҡыҙы Ғибәҙуллина һөнәрендә - 18 йәш. Туймазы медицина колледжынан һуң ул район дауаханаһына, ашығыс ярҙам бүлексәһенә фельдшер булып эшкә урынлаша. Шунан, кейәүгә сығып, Төмәнәк ауылына күсеп киткән. Урындағы медпунктта - 2014 йылдан алып эшләй, 2023 йылдан - мөдире. Регина Шакироваға 29 йәш. Ул да Туймазы медицина колледжын тамамлаған. Тәүҙә Нуркәй фельдшер-акушерлыҡ пунктында фельдшер булып эшләгән, 2023 йылда уны Төмәнәккә күсергәндәр. Зөлфирә Ғибәҙуллина һәм Регина Шакирова ҡарамағында - 1 110 кеше, уларҙың 260-ы - балалар. Медиктар яңыртылған фельдшер-акушерлыҡ пунктында эшләй, уны ауылдаштары - Туймазы эшҡыуарҙары, атаһы һәм улы Марат һәм Ринат Шәйҙуллиндар йүнәткән. Улар беҙҙең «Атайсал» проектын хупланы. Меценаттар арҡаһында фельдшер-акушерлыҡ пункты кәрәкле ҡорамалдар, мебель менән йыһазландырылған, стационар элемтәгә һәм интернетҡа тоташтырылған. Уларға һәм кесе Ватанға ярҙам иткәндәрҙең барыһына ла ҙур рәхмәт. Барығыҙға ла сәләмәтлек теләйем!”- тип яҙған Радий Хәбиров. Фотолар : Радий Хәбировтың шәхси сәхифәһенән.