Ауырғазы районынан “Борзый” позывойлы яугир Донецк Халыҡ Республикаһында мөхәббәтен осратҡан. Ҡыҫҡа ваҡытлы ял осоронда ул кәләшен дә тыуған яғына алып ҡайта. Юрий Барбазюк – пулемет взводының отделение командиры, йылдан ашыу доброволец булып хеҙмәт итә. Башҡортостан юлдаш телевидениеһы егеттең ғаиләһе һәм ғашиҡтар тураһында репортаж әҙерләгән. Сираттағы ял осоронда яугир ата-әсәһе эргәһенә бер үҙе генә түгел, ә Донецк ҡыҙы Катерина менән ҡайта. Кәләшен ғаиләһе менән таныштыра. Катерина Башҡортостанда тәү тапҡыр. Уға милли аш-һыу, халыҡтың ҡунаҡсыллығы оҡшаған. Республикала ҡарҙың күплеге, ҡышҡы тәбиғәт хайран ҡадырған. Бәхетле йәштәр оҙаҡламай Донецкиға юлға сығасаҡ, Юрий хәрби хеҙмәтен, ә Катерина эшен дауам итәсәк. Фото: Башҡортостан юлдаш телевидениеһы.