Һынауҙарға бирешмәй, изге эшкә ҡушылған

«Масксети Ҡалҡан Өфө» ирекмәндәр ойошмаһында дөйөм эштә олоһо ла, кесеһе лә тырыша. Улар махсус операцияла илебеҙ һағында торған егеттәр өсөн ҡалҡан-селтәрҙәр үрә. Был сауаплы эшкә Өфө районының Алексеевка ауылында йәшәгән бала саҡтан инвалид Әлфир Аҡҡужин да ҡушылды. Әлфир - Хәмзә хәҙрәттең бер туған һеңлеһенең улы. Тормош егеттең алдына бала саҡтан уҡ ҡатмарлы һынауҙар ҡуя. Туғыҙ йәшлек сағында машина бәрҙереп, саҡ үлемдән ҡала ул. Башына ауыр операция кисергән балаға яңынан һөйләшергә, атларға, ғөмүмән, был тормошҡа тулыһынса яраҡлашырға тура килә. Ҡыҙғанысҡа ҡаршы, һаулығы ҡаҡшау сәбәпле тиҫтерҙәре менән бергә артабан мәктәпкә йөрөп уҡыу мөмкинлеге булмай. Әлфир өйҙә уҡып, 11-се класты тамамлай һәм аттестат ала. Сәмсел тырыш егетте артабан олатаһы Хәмзә хәҙрәт Өфө ҡалаһындағы Рәсәй Ислам университетына алып килә. Бында ул көндөҙгө бүлектә уҡый, 2014 йылда имам-теолог һөнәре буйынса диплом ала. Әле дин юлында Әлфир. Селтәр үреүсе ирекмәндәр хаҡында ла Хәмзә олатаһы бәйән итә уға. Егет был изге эшкә ҡушылыу теләге менән яна башлай, тик инвалид кешегә ҡала үҙәгенә йөрөү, көнө буйы аяғөҫтө эшләү мөмкин түгел. Шулай итеп, уйланғандан һуң өйҙә ултырып эшләргә ҡарар итә. «Масксети Ҡалҡан Өфө» ойошмаһы ярҙамға килә: ирекмән Венарис ағай егеттең ятаҡтағы бәләкәй бүлмәһендә "һә" тигәнсә селтәр үреү өсөн ҡоролма эшләп ҡуя. Селтәр үреүгә материалдарҙы ла был ойошма бирәсәк. Олатаһы менән ойошмаға килеп, оҫталыҡ дәресе лә алған Әлфир, селтәр үреү серҙәренә төшөнгән. Әйткәндәй, ул әсәһе Дилә Шәмсетдин ҡыҙы менән ҙур булмаған ике бүлмәле ятаҡта көн күрә. Әсәһе ғүмер буйы «Алексеевка» совхозында баҫыу эштәрендә тир түгә. Бүлмә ҡыҫынҡы тип тормаған әсәһе лә, оло йөрәкле улының изге эште башҡарырына шик белдермәгән, ә, киреһенсә, хуплаған. Ысынлап та, Әлфирҙең был аҙымы һоҡландыра һәм күптәр өсөн өлгө булып тора. Маҡсатлы егеткә уңыштар теләйбеҙ! Фото: Әлфир Аҡҡужин.