Бәләкәй балалар үлеме кәмегән

Бөгөн Башҡортостан Башлығы Радий Хәбиров уҙғарған аҙналыҡ оператив кәңәшмәлә республикала әсә һәм бала һаулығын һаҡлау буйынса сараларҙы тормошҡа ашырыу тикшерелде. Республиканың һаулыҡ һаҡлау министры вазифаһын башҡарыусы Роберт Иштуков хәбәр итеүенсә, балалар һаулыҡ һаҡлауының төп йүнәлештәре – сирҙәрҙе иҫкәртеү, алдан диагностикалау һәм һөҙөмтәле дауалау. Башҡортостанда бөтәһе 1 йәштән 17 йәшкә тиклемге 899 159 кеше йәшәй. 2023 йылда балаларҙың һәм үҫмерҙәрҙең 98 проценты профилактик тикшереү үткән. Уларҙа йышыраҡ тын алыу юлдары, аш һеңдереү ағзалары ауырыуҙары һәм күҙ ауырыуҙары асыҡланған. 2023 йылда республика биләмәһендә 3,6 меңдән ашыу бала – махсуслаштырылған һәм юғары технологиялы медицина ярҙамын, ә 1,7 мең пациент федераль медицина ойошмаларында алған. – Республика балалар клиник дауаханаһы табиптары тәүлек әйләнәһенә район дауаханаларында дауаланған балалар өсөн видеоконсультациялар үткәрә, – тине Роберт Иштуков.– Былтыр бөтәһе 1472 телемост үткәрелгән. Шифахана-курорт дауалауы – балаларҙың һаулығын һаҡлау буйынса комплекслы сараларҙың береһе. 2023 йылда республиканан һәр дүртенсе бала шифаханаларға барған, ә 10 меңдән ашыу бала медицина реабилитацияһын үткән. 2023 йылдың 1 ғинуарынан республикала 36 нәҫелдән килгән һәм тыумыштан ауырыуҙарға киңәйтелгән неонаталь скрининг индерелде. – Күрелгән саралар ярҙамында 2023 йылда сабыйҙар үлеме күрһәткесе ете процентҡа кәмегән һәм 1 000 тыуған сабыйға 3,9 осраҡ тәшкил итә, – тип билдәләне Роберт Иштуков. – Шулай уҡ республикала балалар үлеме күрһәткесе кәмене. Бынан тыш, 2023 йылда Башҡортостанда ауырлы ҡатындарҙың һәм бала табыу йәшендәге ҡатындарҙың һаулығын һаҡлау буйынса өҫтәмә саралар индерелде. Атап әйткәндә, бала табыуға ярҙам хеҙмәте йөклөлөк дауамында цифрлы сервистар ҡулланып, пациенттарҙың һаулығын контролдә тота. Ә репродуктив һайлау шарттарында ҡатын-ҡыҙҙарға консультация биреү системаһын камиллаштырыу арҡаһында аборттар һаны 6 процентҡа кәмегән. Башҡортостан Башлығы Радий Хәбиров республиканың Һаулыҡ һаҡлау министрлығына башҡарған эше өсөн рәхмәт белдерҙе һәм республикала сабыйҙар һәм балалар үлемен кәметеү эшен дауам итергә ҡушты. – 2018 йыл йомғаҡтары буйынса балалар үлеме күрһәткесе 6,4 промиллегә етте – дөйөм Рәсәй кимәленән байтаҡҡа юғары, – тине Радий Хәбиров. – Ошо йылдар эсендә бер төркөм саралар күрелде һәм ҙур эштәр башҡарылды. Һөҙөмтәлә үлем кимәлен ике тапҡырға тиерлек кәметтек. Фото: Башҡортостан Башлығы сайты.