Баймаҡ районының Йәнйегет ауылында йәшәгән Фәниә һәм Азамат Ҡарабаевтар ғаиләһе 19 йыл дауамында ата-әсә ҡарауынан мәхрүм ҡалған балаларҙы һөйөү һәм хәстәрлек менән солғай. Уларҙың ғаиләһе етем ҡалған 11 баланан һәм үҙҙәренең дүрт ул-ҡыҙынан тора. Араларында ғаилә ҡороп, хәҙер үҙҙәре сабыйҙар тәрбиәләгәндәре бар. 2006 йылда Ҡарабаевтар апалы-һеңлеле Регина һәм Аделинаны ғаиләгә ала. Һуңғараҡ Гөлназ, Аэлита, Рәзилә, Радик, Ангелина, Карина, бер туғандар Илназ һәм Илйән өҫтәлә. 2024 йылда ғаилә Кристинаны тәрбиәгә ала. Өлкәндәре Раил, Зәлиә һәм Таңсулпан хәҙер үҙҙәре бала тәрбиәләй, кинйәләре Айҙар атаһының өлгөһөндә экскаваторсы һөнәрен һайлай, әле армияла хеҙмәт итә, тип хәбәр итә Ғаилә, хеҙмәт һәм халыҡты социаль яҡлау министрлығы. Ҡарабаевтарҙың иркен йортонда һәр баланың дәрес әҙерләү һәм ижад итеү өсөн үҙ урыны бар. Походтар, спорт күнекмәләре, мәҙәни саралар ғаилә тормошоноң айырылғыһыҙ өлөшө. Оло ғаилә республика һәм Бөтә Рәсәй конкурстарында ҡатнашып, күп тапҡырҙар еңеү яуланы.