Башҡорт йыры украиндарға тынғылыҡ бирмәй

AY YOLA (ӘЙ ЙОЛА) төркөмөнөң “Урал батыр” эпосы нигеҙендә ижад ителгән йыры ғәжәйеп ҡеүәт менән донъяны яулауын дауам итә. Иң ҡыҙығы шунда: ошо көндәрҙә был трек Рәсәйҙе ҡан дошманы күргән Украинаның музыкаль чарттарында ла беренселекте яулаған. Әлбиттә, нацизм идеялары менән янған бәғзе украиндар был хәлде бик ауыр ҡабул иткән һәм улар Рәсәй музыкаһын тыңлауҙы туҡтатырға талап итә. Әммә музыка һөйөүселәрҙең дә үҙ фекере бар. Улар белдереүенсә, музыканың ниндәй илдә һәм телдә ижад ителеүе мөһим түгел, сөнки сәнғәт сәйәсәттән ситен. Әйткәндәй, күптән түгел “Арғымаҡ” һәм AY YOLA проекттары солисы Ринат Рамаҙанов популярлыҡ феномены, уңышҡа килтергән ғәмәлдәр хаҡында уй-фекерҙәре менән бүлешкәйне. “Беҙҙең бөгөнгө төркөмдә ҡатнашҡан һәр кем оҙаҡ йылдар дауамында үҙ йүнәлешендә ижад иткән шәхестәр булараҡ билдәле. Туплаған тос тәжрибә, эшләнгән эштәр, бихисап һөҙөмтәләр бар. Шәхсән үҙемә килгәндә, “Арғымаҡ” проекты һәр саҡ халҡым, телем, илем тигән маҡсаттарға тоғро булды, ошо изге йүнәлештәрҙән тайпылманы. Сит-яттарға бармаған, ил йолаһын боҙмаған төркөм, тип атар инем уны. Бөгөн дә бына ошо тоғролоҡ бар беҙҙең булмышта. Урал батыр һәр саҡ күңелебеҙҙә, йөрәгебеҙҙә. Тап ошо үҙенсәлек беҙгә этәргес бирә, тормош юлында төрлө кешеләр менән осраштыра, тип уйлайым. Нисек кенә сәйер тойолмаһын, был осраҡта мин техник мөмкинлектәр, аранжировка һәм башҡа үҙенсәлектәр икенсел тип уйлайым, сөнки был осраҡта, һис шикһеҙ, Урал батыр рухы эшләй, этәргес бирә. Быны тәүге ҡарамаҡҡа аҡыл менән аңлап бөтөрлөк түгел, аңлатып та булмай. Уйлап ҡарағыҙ, беҙҙең трек донъя чартында Леди Гаганың йырын уҙып киткән, ә бит ул донъя кимәлендәге йондоҙ, уның ижады тирәләй миллионлаған долларҙар өйөрөлә! Шул ваҡытта Башҡортостандан Урал батырға, башҡорт халҡының үлемһеҙ мираҫы булған эпосына бәйле йыр тыуа, донъяны тетрәндерә, хайран итә, рухи яҡтан уята... Уятыу ғына түгел, тарихи хәтерен, ҡанын, тамырын, йәнен тетрәндерә. Туғандаш халыҡтар – ҡаҙаҡтар, үзбәктәр, ҡырғыҙҙар, азербайжандар милли кейемдәрен кейеп, тыуған ерҙәрендә тәбиғәткә сығып, квадракоптерҙар осороп, видеолар төшөрә, атҡа атланып, уҡтар атып, ошо йырҙы ҡабатлай. Ул ғына түгел, төрки донъянан алыҫ торған Корея, Мексика, Германия, Америка кеүек илдәрҙән дә ҡушылалар, йырҙы аңлаталар, төрлө каналдарҙа подкастар эшләйҙәр... Иҫ китмәле. Мин башҡорт, һәм донъяға әйтер һүҙем бар – был йырҙың төп мәғәнәһен ошолай тоям мин. Шул уҡ ваҡытта башҡа милләт вәкилдәре лә шулай тип әйтә алырға тейеш. Урал батыр рухы - мәңгелек, ул үлемһеҙ. Ҡот, рух, дәрт, иман - тап ошо сифаттарҙы Урал батыр рухы уята. Шул уҡ ваҡытта ошо ҡиммәттәрҙе донъяға еткереү өсөн беҙ Урал батырҙы һайламаныҡ, ә ул беҙҙе һайланы, яуаплы миссияны ышанып тапшырҙы, тип уйлайым мин. Кем ижадына тоғро, эшен ихлас итеп, йәне-тәне менән бирелеп башҡара, тап шуларға тәтейҙер бындай бәхет”, - тигәйне Ринат Рамаҙанов. Ә һеҙ нисек уйлайһығыҙ, дуҫтар? Фото: AY YOLA төркөмөнән.