Кыайыы десана көмөлөһөн барда
Улуу Кыайыы 80 сылынан “Снежный Десант РСО. Десант Победы” Бүтүн Россиятааҕы патриотическай аахсыйа чэрчитинэн Алина Архипова хамандыырдаах "Хорсун" десант этэрээтэ 2 Дьөппөн нэһилиэгэр үлэлээтэ.
37 устудьуон нэһилиэк олохтоохторугар, кырдьаҕастарга, Анал байыаннай дьайыы кыттыылаахтарын дьиэ кэргэннэригэр күүс-көмө буоллулар, хаар түһэрэн-күрдьэн, муус хаалаан, мас хайытан-саһааннаан биэрдилэр.
Маны таһынан, 1-кы Дьөппөн орто оскуолатын үрдүкү кылааһын үөрэнээччилэригэр профориентационнай үлэни, квест-оонньууну, волейбол күрэҕин тэрийэн ыыттылар. Сынньалаҥҥа нэһилиэк олохтоохторугар сэргэх эҕэрдэ кэнсиэр туруордулар, ыллаатылар-үҥкүүлээтилэр, көрөөччүлэр олус астыннылар.
"Хорсун" этэрээт үс күн устата үтүө дьыала оҥорон, дьоҥҥо-сэргэҕэ көмөлөһөн, "Өрүү күҥҥэ чугастар!" диэн девизтээх үөрэн-көтөн бардылар, нэһилиэккэ махталлара улахан.
Виктория Катанова, ХИФУ Хотугулуу-Илиҥҥи норуоттар тылларын уонна култуураларын институтун 3 кууруһун устудьуона, "Хорсун" этэрээт байыаһа.
