Әл-фараби атындағы КазҰУ-да робототехника орталығы ашылуы

ҚазҰУ-да робототехника саласындағы жаңа серпін: өндірісті цифрландыруға бағытталған орталық ашылды

Қазақстан Президенті 2019 жылы «Алтын сапа» сыйлығын тапсыру рәсімінде сөйлеген сөзінде: «4.0 индустриясы отандық өнеркәсіпті жаңғыртудың өзекті әрі маңызды бағыттарының бірі болып табылады. Бұл бағытта кәсіпорындарды цифрландыру бойынша пилоттық жобалар жүзеге асырылуда. Нәтижесінде технологиялық дамудың қазіргі деңгейінен «ақылды өндіріс» деңгейіне көшу қамтамасыз етілуі тиіс, яғни өндіріс толық автоматтандырылуы және роботтандырылуы қажет», – деп атап өткен еді.

Осы тапсырманы жүзеге асыру мақсатында 2024 жылы әл-Фараби атындағы Қазақ ұлттық университетінде Робототехника және мехатроника бойынша құзыреттер орталығы құрылды. Бұл орталық – заманауи технологияларды меңгеру, өндіріс үдерістерін цифрландыру және роботтандыру арқылы Қазақстандағы индустриялық даму бағытына серпін беруді көздейтін маңызды жоба.

Аталған орталықты техникалық жабдықтау барысында Германияның жетекші «KUKA» компаниясының роботтарын жеткізу бойынша келіссөздер жүргізіліп, арнайы құрылғылар университетке былтыр әкелінді. Бұл жабдықтар студенттер мен жас мамандарға «ақылды өндіріс» жүйесінде жұмыс істеудің нақты дағдыларын игеруге мүмкіндік береді.

Әл-Фараби атындағы ҚазҰУ ректоры Жансейіт Түймебаев өз сөзінде: «Орталық «Өнеркәсіп-5.0» жүйесінде жұмыс істейтін кәсіби кадрларды даярлап, өндірісті автоматтандыру, цифрландыру бағытында қызмет көрсетуді көздейді. Сондай-ақ стартаптарға технологиялық операцияларды роботтандыру тұжырымдамаларын зерделеу, көрсету және сынау үшін бірегей алаң ұсынады», – деп атап өтті.

Бүгінгі таңда орталық еліміздің жетекші өнеркәсіптік компанияларымен нақты серіктестік орнатуда. Атап айтқанда, «Astana Motors Manufacturing Kazakhstan» және «Hyundai Trans Kazakhstan» кәсіпорындарымен келісімдер жасалып, олардың қызметкерлері орталықта біліктілігін арттырып, практикалық тәжірибе жинақтайтын болды.

Бұл бастама Қазақстанның индустриялық-инновациялық дамуына, бәсекеге қабілетті кәсіби мамандар даярлауға және технологиялық тәуелсіздікке қол жеткізуге бағытталған нақты қадам болып табылады.

Әл-фараби атындағы ҚазҰУ

Механика-математика факультетінің 2 курс студенті Мұтыш Шыңғыс

Аға оқытушысы Сәрсенбай Жанат Асылханқызы