Башҡортостан ҡалалары йәшәү өсөн уңайлы

Башҡортостан ҡалаларының барыһы ла йәшәү өсөн уңайлы, тигән хәбәр республикабыҙ өсөн һөйөнөслө ваҡиға. Былтырғы йыл һөҙөмтәләре буйынса ҡала мөхите сифаты индексы буйынса мәғлүмәттәрҙе Рәсәйҙең Төҙөлөш министрлығы хәбәр итте. Йәшәү уңайлылығы 36 параметр буйынса баһаланған, унда төҙөлөш тә, хәүефһеҙлек тә, транспорт инфраструктураһы ла, юлдар һәм башҡа йүнәлештәр иғтибарға алынған. Ҡалалар унда иң күбе 360 балл йыя ала. Шулай ҙа әгәр сифат индексы 181 балл һәм унан күберәк булһа, ҡала мөхите уңайлы тип иҫәпләнә. Башҡортостандан юғары индексҡа эйә булған ҡалала рәтендә Туймазы, Салауат, Өфө, Дүртөйлө, Ишембай, Яңауыл, Благовещен, Октябрьский, Сибай, Стәрлетамаҡ, Баймаҡ, Бөрө, Ағиҙел, Күмертау, Мәләүез, Учалы, Бәләбәй, Нефтекама, Дәүләкән, Белорет, Межгорье бар. Башҡортостан Башлығы Радий Хәбиров билдәләүенсә, уңайлы мөхит тыуҙырылған ҡалалар һаны республикабыҙҙа артыуға бара. Әйтергә кәрәк, 2018 йылда уларҙың һаны алтау булһа, 2024 йыл һөҙөмтәләре буйынса был һан 21-гә етә. –Ысынлап та, республикабыҙ ҡала һәм ауылдарын төҙөкләндереү буйынса күп нәмәгә өлгәштек. Яңынан-яңы парктар, халыҡты йәлеп итеп торусы урындар булыуын үҙебеҙ ҙә күрәбеҙ. Быйыл “Йәшәү өсөн инфраструктура” милли проектының “Уңайлы ҡала мөхитен формалаштырыу” программаһына ярашлы, тағы ла 164 йәмәғәт биләмәһен төҙөкләндереүҙе планлаштырабыҙ, уларҙың 94-е федераль ҡаҙнанан финанслана. Был йәһәттән эштәр башланды ла инде, – тине төбәк етәксеһе. Дәүләт Думаһының Төҙөлөш һәм торлаҡ-коммуналь хужалығы буйынса комитет рәйесенең беренсе урынбаҫары Павел Качкаев та Башҡортостан ҡалаларының юғары һөҙөмтәгә эйә булыуҙарына үҙ фекерен белдерҙе: – Башҡортостандың барлыҡ ҡалаларын йәшәү өсөн уңайлы итеп таныуҙары – республикабыҙ етәкселегенең һәм муниципаль властарҙың берлектәге, эҙмә-эҙлекле эше. Белеүемсә, беҙҙең бөтә ҡалаларыбыҙ унда мөмкин булған 360 балдың кәмендә 206 балын йыйҙы. Был бик яҡшы ҡаҙаныш, – тине ул. Ҡалаларҙа төрлө төҙөкләндереү программаларын тормошҡа ашырыу һөҙөмтәләре лә юғары балл алыуға юл аса. Мәҫәлән, Башҡортостан Башлығы башланғысы менән булдырылған “Башҡорт ихаталары” программаһының уңышлы эшләүе тураһында беләбеҙ. Райондарға эш сәфәре мәлендә лә ошо программаға ярашлы заманса майҙансыҡтарҙы байтаҡ күргәнебеҙ булды, унда йәшәүселәрҙән рәхмәт һүҙҙәрен дә ишеттек. Йәшәгән ерҙәре күркәмләнгән халыҡтың кәйефе лә күтәренке. Үҙҙәре сәскәләр ултыртып, йәнтөйәктәрен тағы ла матурларға тырышҡан замандаштарыбыҙҙы күреп үҙебеҙ ҙә һөйөндөк. Әйтергә кәрәк, “Башҡорт ихаталары” программаһы 400 меңдән ашыу кешенең йәшәү шарттарын яҡшыртырға булышлыҡ иткән. Ошондай программалар булдырыуы йәһәтенән Башҡортостан илебеҙ төбәктәренә матур өлгө күрһәтә. Фото: “Башинформ” мәғлүмәт агентлығы.