Урындағы үҙидара көнө алдынан дәүләт наградалары тапшырылды

Хәтерегеҙгә төшөрәбеҙ, муниципалитет хеҙмәткәрҙәре үҙҙәренең һөнәри байрамын йыл һайын 21 апрелдә билдәләй. Ошо туралғы указға 2012 йылда Рәсәй Президенты Владимир Путин ҡул ҡуйҙы. – Ҡәҙерле дуҫтар! Муниципаль хеҙмәткәрҙәрҙең намыҫлы хеҙмәте республикабыҙ ҡалалары һәм райондары халҡы өсөн бик мөһим. Һеҙ көн һайын муниципалитеттар эшен ойоштораһығыҙ, ҡатмарлы мәсьәләләрҙе хәл итәһегеҙ. Кешеләрҙең һорауҙарына яуап бирәһегеҙ, уларҙың файҙалы башланғыстарын хуплайһығыҙ. Һеҙҙең эшегеҙ профессионализм, киң компетенциялар ғына түгел, ә кешеләргә иғтибар, юғары яуаплылыҡ талап итә. Быйыл март айында ҡабул ителгән урындағы үҙидараны ойоштороуҙың дөйөм принциптары тураһындағы федераль закон төбәктәргә муниципаль властың структураһын үҙ аллы билдәләү хоҡуғын бирә. Республикабыҙҙа ауыл һәм ҡала биләмәләре менән ике кимәлле муниципаль идара итеү системаһы үҙенең һөҙөмтәлелеген иҫбатланы, шуға күрә беҙ ғәмәлдәге системаны һаҡлап ҡалырға, яҡшы традицияларҙы һәм эшләнмәләрҙе дауам итергә ҡарар иттек. Киләсәктә лә дөйөм тырышлыҡ менән муниципаль хеҙмәттәрҙең уңайлылығын тәьмин итербеҙ, ауылдарҙа инфраструктураны нығытырбыҙ, ижтимағи һәм социаль тотороҡлоҡто һаҡларбыҙ, тип ышанам. Хөрмәтле коллегалар! Республикабыҙ үҫешенә индергән өлөшөгөҙҙө юғары баһалайбыҙ. Тап һеҙ, муниципаль хеҙмәткәрҙәр, стратегияларҙы һәм программаларҙы реаль эштәргә әйләндерәһегеҙ: таҙалыҡты һәм тәртипте һаҡлайһығыҙ, урамдарҙы һәм ихаталарҙы, балалар һәм спорт майҙансыҡтарын төҙөкләндерәһегеҙ, граждандарҙың власть органдары менән тығыҙ бәйләнешен тәьмин итәһегеҙ. Махсус хәрби операцияла ҡатнашыусыларға һәм уларҙың ғаилә ағзаларына ярҙам итеү буйынса эшегеҙҙе айырыуса билдәләйем. Был беҙҙең изге һәм иң мөһим бурысыбыҙ, һәм һеҙ уны лайыҡлы хәл итәһегеҙ. Һеҙҙең битараф булмауығыҙ өсөн рәхмәт. Был беҙҙең еңеүгә лайыҡлы өлөш! Бүләкләнеүселәр тураһында бер нисә һүҙ әйтәйем. Миҙхәт Хәбибулла улы Вәлитов ярты быуаттан ашыу ғүмерен Ауырғазы районын үҫтереүгә арнаны. Хакимиәт башлығы вазифаһында балалар баҡсалары һәм мәктәптәр, медицина учреждениелары һәм башҡа мөһим объекттар төҙөү, ауылдарҙы газлаштырыу, производство инфраструктураһын нығытыу менән әүҙем шөғөлләнде. Уның тырышлығы менән райондың ауыл хужалығы беҙҙең агросәнәғәт комплексы лидерҙарына әүерелде. Илнур Раффаҡ улы Гәрәев күп йылдар Яңауыл районы үҫешенә лайыҡлы өлөш индерә. Хоҡуҡи базаны нығытыу буйынса ҙур эш башҡарҙы. Илнур Раффаҡ улының энергияһы махсус хәрби операцияла ҡатнашыусыларға ярҙам итеүҙә, халыҡты спортҡа йәлеп итеүҙә, “Атайсал” проектын тормошҡа ашырыуҙа депутаттарҙы берләштерҙе. Һеҙ, ысынлап та, власть менән кешеләр араһында бәйләнеш булдырыусы төп звено. Республиканың бөтә ҡаҙаныштары нигеҙендә – һеҙҙең хеҙмәтегеҙ, тәжрибәгеҙ һәм белемегеҙ. Һеҙгә ныҡлы һаулыҡ, именлек, мөһим пландарығыҙҙы һәм башланғыстарығыҙҙы тормошҡа ашырыуығыҙҙы теләйем. Һеҙгә ҙур рәхмәт. Республикабыҙҙың шундай яҡшы, һөҙөмтәле идара итеү командаһы булыуы менән ғорурланам, – тине төбәк Башлығы үҙенең ҡотлау сәләмендә. Фото: glavarb.ru