Күңел һалып башҡарған эш һөҙөмтә бирә

Илеш районының Баҙытамаҡ ауылы биләмәһе хакимиәте башлығы Илфат Рифат улы Закиров 2023 йылдың сентябрендә генә ошо вазифаға һайланып ҡуйылһа ла, үҙен булдыҡлы етәксе итеп күрһәтеп өлгөргән. Быға ғәжәпләнергә лә түгел, сөнки уның бар тормош юлы ошо ерҙән айырылмаған, урындағы халыҡты ла яҡшы белә, ауылдаштарының һулышы ла яҡшы таныш. Илфат Рифат улы 1986 йылда Баҙытамаҡ ауылында тыуып үҫкән. 2004 йылда Башҡортостан ауыл хужылығы университетын тамамлағас, ике йыл хеҙмәт итә. Ватан алдында бурысын үтәп ҡайтҡас, 2006 йылда “ХХII партсъезд” ауыл хужалығы кооперативы ветеринар табип булып эшкә урынлаша. 2012 – 2013 йылдарҙа Этәй ауылында “Правда” ауыл хужалығы кооперативында бер йыл ветеринар булып эшләгәндән һуң шәхси предприятиеһын аса. Ул ауыл биләмәһе башлығы булып эшләгән осорҙа үҙен яуаплы, инициативалы, намыҫлы, үҙенә һәм коллективҡа талапсан етәксе итеп күрһәтә. Үҙ бурыстарын яҡшы белә, һәр эште алдан планлаштырып, маҡсаттарҙы билдәләй. Уның оҫта етәкселеге аҫтында ауыл биләмәһе былтыр биләмәләрҙе төҙөкләндереү буйынса конкурста ҡатнашып, Илеш районы хакимиәтенең ауыл биләмәләре араһында 100 000 һумлыҡ гран-при яулай. Ошо еңеү уның эште планлаштырыу һәм ойоштороу оҫталығының сағыу миҫалы булып тора. Уны хеҙмәттәштәре егәрле, һәләтле һәм тынғы белмәгән етәксе тип белә. Илфат Закиров даими рәүештә үҙенең профессиональ кимәлен күтәрә, яңылыҡтарҙы күҙәтә һәм өйрәнә, уларҙы практик эшмәкәрлектә оҫта ҡуллана. Ауыл биләмәһе башлығы булараҡ, халыҡтың социаль-көнкүреш шарттарын яҡшыртыу тураһында ҙур хәстәрлек күрһәтә. Ауыл старосталары, ауыл биләмәһе депутаттары менән берҙәм, кәңәшләшеп эшләй. Һөҙөмтәлә 2024 йылда ауыл биләмәһен берләштергән төрлө милләтле туғыҙ ауыл халҡы менән күп эштәр башҡарыуға өлгәшкәндәр. “Урындағы башланғыстарға булышлыҡ итеү" программаһында ҡатнашып, “МТЗ” тракторына тағылма һәм аҫылмалы ҡорамалдар һатып алғандар. “Берҙәм Рәсәй”ҙең “Реаль эштәр” Бөтә Рәсәй партия проекты буйынса урам яҡтыртыу лампаларын алмаштырыу һәм ҡуйыу буйынса монтаж эштәрен атҡарғандар. Граждандар инициативаһы буйынса Баҙытамаҡ, Сейәле-Әтәс һәм Ташкисеү ауылдарында йылғалар аша күперҙәр төҙөлә. Иҫке Нәдир ауылы халҡы ике зыяраттың да кәртәләрен профнастилға алмаштыра. Ауыл биләмәһе хакимиәте Иҫке Нәҙер ауылы зыяраты өсөн ерләү өйө төҙөй. Ҡыҙыл Йондоҙ ауылы халҡы Бөйөк ватан һуғышында ҡатнашыусыларға һәйкәл аса. Яугир әсәһе, хәрби туғанлыҡ, “ХХII партсъезд” ауыл хужалығы кооперативы, ауыл биләмәһе хакимиәте инициативаһы менән Кесе Тәжәй ауылында шишмә төҙөкләндерелә һәм махсус хәрби операция барышында һәләк булған яугир М.М. Мостафиндың исеме мәңгеләштерелә. Баҙытамаҡ һәм Ташкисеү ауылдарында стеллалар төҙөлә һәм ҡуйыла. Ауыл урамдары таш түшәлгән, һыу ҡыуҙырыу башняларын ремонтлау һәм башҡа эштәр башҡарылған. – Кешеләргә иғтибарлы, итәғәтле. Халыҡты тыңлай һәм ишетә белә. Граждандарҙы ҡабул итеүҙе оҫта ойоштора, даими рәүештә граждандарҙың дөйөм йыйылыштарын үткәрә. 2-се һайлау округынан депутат булараҡ, һайлаусылар менән осрашыуҙар үткәрә, шәхси мәсьәләләр буйынса һайлаусылар ҡабул итә, йәмәғәтселек фекерен, халыҡтың ихтыяждарын өйрәнә һәм уларҙы үтәү сараларын күрә. Иғтибарлы, әҙәпле, ауыр хәлдәр килеп тыуғанда дөрөҫ ҡарар табырға тырыша. Ауыл биләмәһе халҡында абруйы бар, – ти уның хеҙмәттәштәре. Илфат Закиров "Башҡортостан" гәзитенең "Бәйләнештә" төркөмөндә ойошторған "Иң яҡшы ауыл биләмәһе башлығы" конкурсында ҡатнаша. Уңған етәксегә уңыштар теләйбеҙ! Фото: Баҙытамаҡ ауыл биләмәһенән.