Үҙен белгәндән алып Әбйәлил егете Азат Атанғолов гармун моңона ғашиҡ. Шуға ла алты йәшенән был музыка ҡоралында уйнауына һис ғәжәпләнәһе түгел. Өҫтәүенә әрме сафында хеҙмәт иткәндә уға Рәсәйҙең беренсе гармунсыһын, ул саҡта “Уйна, яратҡан гармун!” тапшырыуын алып барыусы Геннадий Заволокинды үҙ күҙҙәре менән күрергә насип булған. 90-сы йылдарҙа билдәле артист үҙенең телевизион төркөмө менән Амур өлкәһенең Тында ҡалаһына килгән икән. Ә Азат шунда хәрби оркестрҙа хеҙмәт иткән. Ошо тапшырыуҙа ҡатнашыу бәхете тәтей егеткә. Хәҙер Әбйәлил районының Асҡар музыка мәктәбе уҡытыусыһы Азат Ханнан улы Атанғолов Рәсәй гармунсыларының “Алтын унау” исемлегенә индерелгән. – 2012 йылда Әбйәлилгә күрше Магнитогорск ҡалаһында ошо тапшырыу төшөрөлгән ваҡытта Геннадий Заволокиндың эшен дауам иткән ҡыҙы Анастасия менән улы Захар, сығышымды оҡшатып, Новосибирскиҙа үтәсәк фестивалгә саҡырҙы. Әсәйем, билдәле сәсәниә Хәнифә Әбүбәкирова бала сағымда алып биргән, ваҡыт үтеү менән иҫкергән гармун менән артыҡ уңышҡа өлгәшә алмаҫымды һиҙемләһәм дә, сарала ҡатнашырға йөрьәт иттем. Шулай конкурстың лауреаты дипломына лайыҡ булдым, – ти Азат. Был бәйгенән һуң да әллә күпме сараларҙа үҙен һынап ҡараны ул. Былтыр Яңауылда уҙған Фәтих Иҡсанов исемендәге “Моңға бай гармун байрамы” республика конкурсында ҡатнашты. Башҡортостандың халыҡ артисы, Салауат Юлаев ордены кавалеры Хәлит Фәтихов рәйеслегендәге мәртәбәле жюри алдында Башҡортостандың дүрт ҡалаһынан һәм 21 районынан, шулай уҡ Түбәнге Новгород һәм Свердловск өлкәһенең Ревда ҡалаларынан талантлы башҡарыусылар үҙҙәренең оҫталығын һәм һәләтен күрһәтте. Конкурста бөтәһе 19 ансамбль һәм 41 солист ҡатнашты. Әбйәлилдән Азат Атанғолов республика гармунсылар конкурсында һәүәҫкәрҙәр араһында Гран-приға лайыҡ булды. Тыуған яғына ҡайтҡанға тиклем Азат Салауат музыка училищеһында, Магнитогорск ҡалаһындағы Башҡорт сәнғәт йортонда, Әбйәлилдең Йәнгел ауылы музыка мәктәбендә эшләгән. Ҡайҙа ғына булмаһын, ул бер ҡасан да гармунынан айырылмаған. Ҡатыны Фирүзә лә, башланғыс кластар уҡытыусыһы булһа ла, шулай уҡ сәнғәткә ғашиҡ кеше. Әле ул Әбйәлил районының Ишҡол ауылында тәрбиәсе һәм шул уҡ ваҡытта музыка етәксеһе булып эшләй. Шуныһы һөйөнөслө: Атанғоловтарҙың балалары – Азалия менән Наҙгөл дә ижадҡа ғашиҡ. Улдары Асҡарға әле өс кенә йәш. Бәлки, ул да киләсәктә атаһы кеүек гармунсы булыр? Ә әлегә уның, бәләкәс кенә булһа ла, йыр-моңға ғашиҡ икәнлеге күренеп тора. 1976 йылда, Аждаһа йылында, тыуған Азат Атанғолов ошо йыл хужаларына хас булғанса ҡыйыу, тәүәккәл,сәмсел һәм маҡсатлы. Быға уның бала саҡ хыялы булған гармунда уйнау, ул ғына түгел, сәхнәлә, шул иҫәптән тотош Рәсәй сәхнәләрендә милләттәшебеҙ булараҡ сығыш яһауы асыҡ дәлил. Бынан тыш, ул бер нисә йыл элек Леонид Якубович алып барған “Мөғжизәләр яланы”нда ла ҡурай менән гармунда уйнап барыһын да таң ҡалдырҙы, тамашасыларҙы башҡорт моңо менән таныштырҙы. Алдына ҡуйған маҡсаттары күп әле Азаттың. Уларҙың барыһы ла тормошҡа ашһын! Фотолар: Азат Атанғоловтың шәхси архивынан.