Бөгөн Башҡортостан халыҡ шағиры Рауил Шаммасов менән хушлашты

Башҡорт әҙәбиәте һәм мәҙәниәте оло юғалтыу кисерҙе: бөгөн республика халыҡ Башҡортостандың халыҡ шағиры Рауил Шаммасов менән хушлашты. Рауил Сәхиулла улы Шаммасов (әҙәби псевдонимы Рауил Шаммас) 1930 йылдың 9 ноябрендә Стәрлебаш районының Уразай ауылында крәҫтиән ғаиләһендә тыуған. 1952 йылда район үҙәге Стәрлебаш ауылындағы 1-се һанлы урта мәктәпте тамамлағас, элекке Матрай (хәҙерге Йылайыр) районының Һабыр ете йыллыҡ мәктәбендә, 1956 йылдан Стәрлебаш районының Йәшергән урта мәктәбендә балалар уҡыта. 1958 йылда үҙ районының ул саҡтағы «Знамя коммунизма» — «Коммунизм байрағы» (аҙаҡтан «Стәрлебаш шишмәләре») гәзитендә әҙәби хеҙмәткәр булып эш башлай. Төп хеҙмәтенән айырылмай, Стәрлетамаҡ педагогия институтының филология факультетына уҡырға инә һәм уны ситтән тороп 1960 йылда тамамлай. 1962 йылда «Ҡыҙыл таң» республика гәзите редакцияһына күсә, яуаплы сәркәтип урынбаҫары, 1968—1970 йылдарҙа бүлек мөдире була. 1972—1981 йылдарҙа Башҡортостан китап нәшриәтендә әҙәби мөхәррир вазифаһын башҡара. 1982—1984 йылдарҙа СССР Тыныслыҡты яҡлау комитетының Башҡортостан бүлексәһендә яуаплы хеҙмәткәр. Аҙаҡтан 1995 йылға тиклем Башҡортостан Яҙыусылар союзы аппаратында эшләй, шул иҫәптән пропаганда бюроһын етәкләй. Бер ни тиклем ваҡыт «Һәнәк» журналында әҙәби хеҙмәткәр булып та эшләп ала. Башҡортостан Республикаһы Башлығының 2021 йылдың 18 ғинуарындағы указы менән Рауил Шаммасҡа «Башҡортостандың халыҡ шағиры» тигән маҡтаулы исем бирелде. Рауил Шаммас — киң ҡырлы, тәү сиратта лирик философияға, күңелсән юморға һәм үткер сатираға тоғро шағир ине. Ике тиҫтәнән артыҡ китап авторының әҫәрҙәре белорус, рус, украин, ҡараҡалпаҡ, мари, татар һәм башҡа телдәрҙә нәшер ителгән. Уның шиғырҙарына билдәле композиторҙар Салауат Низаметдинов, Рим Хәсәнов, Тәлғәт Шәрипов һәм башҡалар тиҫтәләгән йыр ижад иткән.Һуңғы йылдарҙа насар күреү сәбәпле, ҡатыны Гөлсөм ханым Рауил Сәхиулла улының ижадташына әүерелә. Улы Алмас иһә, атаһы юлынан китеп, үҙен талантлы шағир итеп таныта, бер нисә йыйынтыҡ баҫтыра.Халыҡ шағиры тыуған яғы Стәрлебашта ерләнәнде. Яҡындарының, туғандарының ҡайғыһын уртаҡлашабыҙ, сабырлыҡ теләйбеҙ. Фото: Шаммасовтарҙың ғаилә архивынан.