Александр Уляшев 26 дек в 14:53 ТӦЛЫСЬ ВЫВСА НЫВ
Енэж кодзувъяс мед койӧ,
Тӧлысь мыччӧ югыд чужӧм.
Медым татшӧм мича войӧ
Ыджыд КӦСЙӦМ менам чужӧ.
Эм сэн нывка тӧлысь вылас,
Карнан пельпом вылас нуӧ.
Кӧсъя, медым сійӧ нылыс
Ӧтчыд лэччывлас кӧть муӧ.
Кӧсъя аддзӧдчывны сыкӧд,
Юавны, дерт, ковмас, гашкӧ:
Мыйла ӧтнас, абу кыкӧн?
Ӧтнаслы мӧй абу гажтӧм?
Шуӧны, мый мамтӧм нылӧс
Ичинь ыстас вала тӧлын.
Шогсӧ нылыслысь сэк кылас,
Ас дінас и босьтас тӧлысь.
Торйӧдасны муса дорсьыс
Мамтӧм нылӧс—ичиньводзӧс,
Зонмыс нывсӧ дыр нин корсьӧ,
Ӧнӧдз на эз сійӧс аддзы.
Тӧлысьлысь ме талун кора:
Босьт тшӧтш сійӧс аслад позйӧ
Муса зонсӧ нылыс дорӧ,
Оласны мед сэні гозйӧн.
А.Уляшев.
