Яңы йылда - яңы фельдшер-акушерлыҡ пункты!

Яңы йыл алдынан Әбйәлил районының Яҡтыгүл ауылы халҡы оло шатлыҡ кисерҙе. Бында күптән көтөлгән фельдшер-акушерлыҡ пункты сафҡа инде. “Һаулыҡ һаҡлау” милли проектының “Тәүге медицина-санитария ярҙамы күрһәтеү системаһын үҫтереү” проектына ярашлы сафҡа ингән заманса медицина учреждениеһы - районда дүртенсе модулле ФАП. Өр-яңы, йылы һәм уңайлы медпункт өсөн бигерәк тә ололар ҡыуанды. Был яңы фельдшер-акушерлыҡ пунктында кәрәкле йыһаздар, тикшереү һәм процедура-прививка яһау кабинеттары, ҡабул итеүҙе көтөү өсөн урын, шулай уҡ санузел һәм хеҙмәткәрҙәр өсөн сисенеү бүлмәһе бар. Бина кәрәкле коммуникацияларға тоташтырылған, шулай уҡ электр йылытыу ҡоролмаһы иҫәбенә эҫе һыу менән тәьмин ителгән. Заманса медицина ҡорамалдары, уңайлы мебель, йылы һәм яҡты бүлмәләр фельдшерға уңайлы шарттарҙа эшләргә, ә пациенттарға сифатлы һәм квалификациялы медицина-санитария ярҙамы алырға ярҙам итәсәк. Рәсәй Президенты Владимир Путиндың “май“ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһының маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: "Осҡон" гәзите