Торлаҡ-коммуналь хужалыҡ министрлығы йылға яҡынса йомғаҡ яһаны. Республиканың торлаҡ-коммуналь хужалығы – күп тармаҡлы комплекс. Унда 25 меңдән ашыу кеше эшләй, бер нисә йөҙ ойошма 18 меңдән артыҡ йортто йылылыҡ, һыу, газ, электр энергияһы һәм башҡа хеҙмәттәр менән тәьмин итә. Был тармаҡтың стратегик маҡсаттары үҙгәрмәй: был республика халҡының тормошон уңайлы, хәүефһеҙ итеү, ныҡлы һәм тотҡарлыҡһыҙ хеҙмәттәр күрһәтеү, уларҙың сифатын арттырыу. Уҙып барған йылда ла министрлыҡтың, район-ҡалалар хакимиәттәренең, ойошмаларҙың эше милли проекттарға, дәүләт һәм республика программмаларына ярашлы алып барылды. Бынан алдағы кеүек үк, 2023 йылда ла йәмәғәт киңлектәрен, йорт ихаталарын, биләмәләрен төҙөкләндереүгә, подъездарҙы рәтләүгә һәм күп фатирлы йорттарҙы капиталь ремонтлауға айырым иғтибар бирелде. Был эштәр, шулай уҡ уңайлы ҡала мөхите булдырыуға иң яҡшы проекттар буйынса бөтә Рәсәй конурсында еңеп сыҡҡан эштәрҙе тормошҡа ашырыу буйынса саралар дауам ителә. Бынан тыш, социаль әһәмиәтле программалар ҙа туҡтатылмай. 2023-төң тағы бер мөһим күрһәткесе – “Таҙа һыу” милли проектының маҡсатлы күрһәткестәренә өлгәшеү, тип билдәләй ведомство. Коммуналь инфраструктура системаларын яңыртыу буйынса ла маҡсатлы эш алып барыла. Төрлө йүнәлешле эш араһында “2023-2027 йылдарҙа коммуналь инфраструктураны модернизациялау” тигән республика программаһы ла бар. Уның буйынса эштәр тап 2023 йылда атҡарыла башланы. Коммуналь техника паркы тулыланыуын да уҙып барған йылдың яҡшы һөҙөмтәһе тип атарға мөмкин. Был эш артабан да дауам ителә. Дөйөм алғанда, торлаҡ-коммуналь хужалыҡ өлкәһенә ярҙамға быйыл республика бюджетынан 11,28 миллиард һумдан ашыу аҡса йүнәлтелгән, был былтырғыға ҡарағанда байтаҡҡа артыҡ. Федераль бюджеттан, бюджеттан тыш фондтарҙан килгән ярҙам да арта төшкән. Быйылдың 11 айында тармаҡҡа 3,97 миллиард һум аҡса йүнәлтелгән, был 2022 йылға ҡарағанда 15 процентҡа күберәк. Сығанаҡ: pravitelstvorb.ru/news/22654/