Башҡортостан Республикаһы Хөкүмәте премьер-министры Андрей Назаров донъя кимәлендәге вуз-ара кампустың беренсе сиратын төҙөү тамамланышын тикшерҙе. Сарала икенсе этап төҙөлөшө буйынса эшлекле кәңәшмә лә булды. Андрей Назаров төҙөүселәргә рәхмәт белдерҙе һәм уҡыу йоттарының, индустриаль партнерҙарҙың кампусҡа инеү графигын раҫланы. “Беҙ ярайһы уҡ амбициялы бурысты үтәнек. Беренсе этап эштәре ҡыҫҡа ваҡыт эсендә тамамланды. Ғинуарҙа юғары дәрәжәле ҡунаҡтар ҡатнашлығында тантаналы рәүештә яңы ғилми лабораторияларҙы асырбыҙ”, – тине премьер-министр. Министрҙар кабинеты етәксеһе билдәләүенсә, Башҡортостан фәнни һәм белем биреү компетенциялары менән көслө. Өфө кампусында планлаштырылған фәнни тикшеренеүҙәрҙең үҙенсәлектәре ғәмәлдәге компетенциялар, шулай уҡ Рәсәйҙең фәнни-техник үҫешен һәм лидерлығын тәьмин итеүсе йүнәлештәр нигеҙендә формалаша, тип билдәләне А. Назаров. Был – биомедицина һәм генетика, инжиниринг һәм алдынғы етештереү технологиялары, һанлы һәм йәшел химия, шулай уҡ яңы йәшәү мөхите. Был йүнәлештәр 146 мең квадрат метр майҙанда тормошҡа ашырыласаҡ. Уларҙа уҡыу һәм йәшәү урындары, лабораториялар, фәнни үҙәктәр һәм йәмәғәт урындары урынлаша. Проект хаҡы 27 миллиард һум самаһы тәшкил итә. Декабрь аҙағы – ғинуар башында вуз-ара кампустың беренсе сираты – IQ-парк эшләй башлай. “Хәҙер беҙҙең уртаҡ бурыс – принципиаль яңы инновацион мөхит булдырыу. Кампус бөтә Евразиянан килгән һәләтле йәштәрҙе йәлеп итеү нөктәһенә әйләнергә тейеш. Перспективалы йүнәлештәр буйынса белем биреү программаларын тормошҡа ашырасаҡбыҙ. Ғөмүмән, Евразияла Ватан фәне һәм мәғарифы мәнфәғәттәрен алға ебәреү бурысын ҡуйҙыҡ, — тине премьер-министр, пландарҙың амбициялы, әммә тормошҡа ашырып булырлыҡ икәнен билдәләп. Хәтерегеҙгә төшөрәбеҙ, кампус Рәсәй Федерацияһы Президенты Владимир Путин ҡуйған бурыс буйынса Рәсәй Мәғариф һәм фән министрлығының "Фән һәм университеттар" милли проектын тормошҡа ашырыуға ярашлы төҙөлә. Сығанаҡ: pravitelstvorb.ru/news/22692/