Беҙ барыбыҙ ҙа сәй эсәбеҙ, әммә һаулыҡ өсөн файҙалы яғын уйламайбыҙ. Сәй эсеү организмыбыҙға ярҙам итһен өсөн уларҙы бер аҙ төрлөләндерергә кәрәк. Бөтнөк (мята) Тынысландырыусы сәй. Бөтнөк ашҡаҙан эшен нормаға килтерә, ОРВИ һәм киҙеүҙе еңеләйтә ала, бронхит ваҡытында йүткереү менән яҡшы көрәшә. Уның составында булған ментол ярҙамында ул бактерияларға ҡаршы тәьҫир яһай. Әлморон (шиповник) Кем әлморондо белмәй икән! Был тән температураһы юғары булғанда ярҙамға килеүсе. Әлморонда С витамины лимондағыға ҡарағанда 50 тапҡырға күберәк. Антиоксиданттар ярҙамында ул организмдың ҡартайыуын иҫкәртә һәм йөрәктең яҡшы эшләүен тәьмин итә. Уны айырым да, сәйгә өҫтәмә сифатында ла эсергә мөмкин. Бәүел һәм тир ағыҙыу тәьҫире бар. Ҡарағат Ҡара һәм ҡыҙыл ҡарағат япраҡтары һәм еләге сәйгә тәмле тәм бирә. Мигрень, бәүел ҡыуығындағы проблемаларҙан ҡотолорға ярҙам итә, баҫымды нормаға килтерә. Ҡышҡылыҡҡа ҡарағатты шәкәр менән болғап әҙерләргә мөмкин. Ул саҡта ҡайнатҡанға ҡарағанда файҙалы үҙенсәлектәрен юғалтмай. Кейәү үләне, ҡанүлән (чабрец) Кейәү үләне сәйенең тәме йомшаҡ. Ангина һәм радикулит ваҡытында ярҙам итә. Шулай уҡ тынысландыра һәм дезинфекциялай. Ҡурай еләге (малина) Был сәй - күптәрҙең бала сағындағы яратҡан эсемлеге. Был үҫемлектә тимер, фолий кислотаһы һәм витаминдар күп. Ҡурай еләге менән эсемлек һалҡын тейеүҙән йүнәлеүҙе тиҙләтә, тән температураһын кәметә һәм аппетитты көйгә һала. Шулай уҡ үҙәк көйөү һәм ашҡаҙан-эсәк менән бәйле башҡа проблемаларҙан яфаланғандарға ла кәңәш ителә. Йүкә Йүкә сәйе, йүкә балы... Үҙенсәлектәре буйынса йүкә — камил үҫемлек. Тирләтеү һәм температураны төшөрөү эффектына эйә. Уны бронхит, һалҡын тейеү һәм юғары температурала ҡабул итәләр. Кискеһен сәй эсһәгеҙ, ул һеҙгә иртәнгә тиклем көслө һәм сәләмәт йоҡо бүләк итер. Йүкә сәскәләрен июнь һәм июль айҙарында әҙерләргә кәрәк. Ер еләге Сәйгә өҫтәмә сифатында яңы йәки киптерелгән япраҡтар һәм емеш-еләк ҡулланыла. Ер еләгенең иҫ киткес еҫе бер кемде лә битараф ҡалдырмаҫ. Тәм сифаттарынан тыш, был эсемлеккә антибактериаль һәм шешеүгә ҡаршы үҙенсәлектәр хас. Әҙерләнгән сәйҙе гипертония, бронхиаль астма, бәүел сығарыу системаһы ауырыуҙары ваҡытында ҡулланалар. Еләкле эсемлекте эҫе лә, һалҡын да килеш эсегеҙ. Автор фотолары.