Ер минең тирәләй 57 тапҡыр өйрөлгәнен күҙәтәм

Салауат Юлаев ордены кавалеры Әлибаев Зәки Арыҫлан улының бөгөн тыуған көнө. Ул 1967 йылдың 10 ғинуарында Белорет районының Йөйәк ауылында тыуған. Зәки Әлибаев тыуған көнө айҡанлы үҙенең тормошоноң ҡайһы бер мәлдәре тураһында “Бәйләнештә” социаль төркөмөндәге сәхифәһендә уртаҡлашҡан. "Ер минең тирәләй 57 тапҡыр өйрөлгәнен күҙәтәм. Ҡаратауҙан ҡояш күтәрелеп, ҡалын боҙ аҫтында ашыға-ашыға, таштарҙан-таштарға һикерә-һикерә аҡҡан Инйәремә сәләм биреп, ауыл өҫтөн байҡап, мөрйәләрҙәге тура сыҡҡан төтөндө тикшереп, бер аҙ һилләнгәс, атайым аттарын һуғарыр өсөн мәке уйырға сыҡҡас, сәғәт 11-ҙә ауаз һалғанмын. Кендек әбейе - Фәтиха унынсы баланы ҡулына алғас, көйләй-көйләй (ул йырауҙар һымаҡ таҡмаҡлап һөйләшә ине) инәйемә тотторған. Ял көнө, радиоалғыстан концерт бара. Йәш йырсы Зәки Мәхмүтов өҙҙөрөп йырлай. Бар донъяны моң баҫа. Иҙерәп кенә Инәйемдең ҡосағында бәүелеп, ыуыҙҙан ризыҡланғанда, Ҡояш тәҙрәнән иркәләп, моңдо бар Йыһанға таратты. Күп тармаҡлы Әлибаевтар менән Миһрановтарҙың нәҫел шәжәрәһенә бер быуын өҫтәлде. Ҡышҡы сатлама төшкә бер аҙ емшеһә лә, урмандағы имәндәрҙе шарт ярырлыҡ... Исемемде иң өлкән ағайым - Ҡасим һайлаған. Шөкөр, атай-инәй, өс ағай һәм өс апай ҡарамағында матур ғаиләлә үҫтем. Әле лә иң терәрлек туғандарым иҫән-һау, собханалла! Ғаиләм - ҡәлғәм. Яратҡан һәм яратып туя алмаған ҡатыным Разия (әйткәндәй, инәйем дә Разия ине), һылыуҙарҙан-һылыу, берҙән-берем Әҙилә ҡыҙым, баһадирҙай өс улым - Риф, Сәғит, Арыҫланым яндарымда. Ейәндәрем Камилла, Айҙар һәм Урал, килендәр менән бер тиҫтәнән артып барабыҙ.Тормошомдоң асылы булған, булмышымды асып бирерҙәй эшем һәм студенттарым бар. 30 йылдан ашыу уҡытһам да, һаман да уларға ынтылам. Улар - рухи ҡанаттарым. Талмаһын ғына! Миңә Мифтахетдин Аҡмулла исемендәге Башҡорт дәүләт педагогия университетында эшләргә насип булды, университеттан һәм хеҙмәттәштәремдән уңдым. Халҡыма, ул тыуҙырған рухи ҡиммәттәрҙе күреүемә, ишетеүемә, уҡыуыма, тойоуыма мең рәхмәтлемен. Тормош елкәндәре әҙер, ярһыу диңгеҙҙә сәйәхәт дауам итә. Туҡтамаһын әле..." - тип яҙған ул. Зәки Әлибаев – ғалим, әҙәбиәт белгесе, тәнҡитсе. 1992 йылдан Башҡорт дәүләт университеты, 2009 йылдан – Мифтахетдин Аҡмулла исемендәге Башҡорт дәүләт педагогия университеты уҡытыусыһы. 2017 – 2022 йылдарҙа - Башҡортостан Республикаһының Яҙыусылар союзы рәйесе. Филология фәндәре кандидаты (1997), доцент. Рәсәй Федерацияһының һәм Башҡортостан Республикаһының Яҙыусылар союзы ағзаһы. Башҡортостан Республикаһының атҡаҙанған мәғариф хеҙмәткәре (2012), Салауат Юлаев ордены кавалеры (2022). Фото: vk.com/zakiarslanovit