Рәсәй Эске эштәр министрлығының Ағиҙел ҡалаһы буйынса бүлегенә ҡатын 76 йәшлек ире һунарға китеүе һәм әйләнеп ҡайтмауы тураһында хәбәр итә. Юғалған һунарсыны эҙләүгә шунда уҡ полиция хеҙмәткәрҙәре һәм ҡотҡарыусылар йәлеп ителә. Икенсе көндө иртәнсәк эҙләү саралары һөҙөмтәһендә Ағиҙел ҡалаһынан ЮХХДИ экипажы – полиция лейтенанты Руслан Сәғҙиев һәм полиция кесе лейтенанты Артур Зуев – Саклов ауылынан яҡынса 30 километр алыҫлыҡта урманда ирҙе таба. Инспекторҙар урманда тәүлеккә яҡын булған иргә ярҙам күрһәтә. Ул буран арҡаһында аҙашҡанын һөйләй: ҡуян эҙенән киткән һәм кире юлды таба алмаған, юлын һепертмә буран ҡаплаған. Автоинспекторҙар уны өйөнә тиклем алып бара. Ирҙең ғаиләһе яҡын кешеһен эҙләүҙә һәм ҡотҡарыуҙа ҡатнашҡандарға рәхмәт белдергән. Фото: @bash_gibdd