26 декабрҙә Башҡортостан Башлығы Радий Хәбиров Өфөләге күп профилле һөнәрселек колледжында булды. Был уҡыу йорто 1939 йылда асылған, колледж статусын 2012 йылда алған. Төбәк етәксеһе уҡыу йортоноң эшмәкәрлеге менән танышты, уның нигеҙендә һөнәри белем биреү буйынса ултырыш уҙғарҙы. Колледж директоры Сынтимер Баязитов быйылғы уҡыу йылында бында төрлө йүнәлештәр буйынса 2658 студенттың белем алыуы тураһында һөйләне. Уҡыу йорто федераль программаларҙа әүҙем ҡатнаша, ошо рәүешле матди-техник базаны нығытыу сараһын күрә. Мәҫәлән, “Йәш профессионалдар” проектына ярашлы 2022 йылда ике заманса оҫтахана асылған. 2023 йылда колледжда “Профессионалитет” федераль проекты буйынса “Башҡортостандың белем биреү учреждениелары өсөн кадрҙар әҙерләү үҙәге” белем биреү кластеры булдырылған. Колледж эргәһендә педагогия хеҙмәткәрҙәренең оҫталығын күтәреү буйынса үҙәк тә эшләп килә. Ул 2019 йылда “Киләсәк уҡытыусыһы” федераль проекты сиктәрендә асыла. Радий Хәбиров программистар, мәктәп һәм мәктәпкәсә йәштәге балалар өсөн психологтар әҙерләгән йыһазландырылған уҡыу кабинеттарын ҡараны, оҫтаханалар менән танышты. Унда буласаҡ парикмахерҙар, визажистар, стилистар һәм ашнаҡсылар һөнәри оҫталыҡҡа өйрәнә. - Бөгөн беҙ ябай колледжды республиканың көслө күп профилле белем биреү үҙәгенә әйләндереүҙең, матди базаһын нығытыуҙың, эш биреүселәр менән партнер мөнәсәбәте булдырыуҙың яҡшы өлгөһөн күрҙек, - тине республика етәксеһе. Фото: Башҡортостан Башлығы сайтынан.