Бында халыҡҡа мөғжизәгә ышанып йәшәрә генә ҡала...

Белорет районының Баҡый, Һаралы ауылдары берәй ҡасан юллы булырмы икән? Социаль селтәрҙәге “Бәйләнештә” төркөмөндә Раят Вәлиевтың сәхифәһендә боҙло йылға аша сығырға тырышҡан автомобиль тураһындағы видеояҙмаһын ҡарағас, ошондай һорау тыуҙы. Ә бит был мәсьәлә инде күпме йылдар дауамында хәл ителмәй килә. Совет осоронда ағасын ташыһалар ҙа юл һала алманылар. Түрәләр мең бәлә менән ошо ауылға килеп ҡайта ине, тәбиғәттең матурлығына һоҡланып, Баҡый балын маҡтап. Тик үҙҙәренең яҡшы юллы ҡалаларына ҡайтып ингәс тә юл мәсьәләһен хәл итеү тураһындағы вәғәҙәләрен оноттолар. 90-сы йылдарҙан, район гәзите “Урал”да эшләгән саҡтан, халыҡтың юл тураһындағы аһ-зарын беләм, ошо хаҡта мәҡәләләр ҙә яҙылды. Үҙем дә әллә нисә тапҡыр был юлдан үткәнем булды. Юл түгел ул, гүр ғазабы. Ошо арҡала халыҡ та яратҡан төбәген ташлап, юллы-эшле урындарға күсеп бөтөп бара. Әммә илһөйәрҙәр тыуған еренән китергә йыйынмай, шунда үҙҙәренә шөғөл табып, кәсепселек менән көн күрергә тырышып ятҡан була. Уларға иһә ситкән күсеп киткән туғандары, балалары ярҙам итергә тырыша. Раят Вәлиев был хаҡта түбәндәгеләрҙе яҙа: “Ошо Шырышҡы кисеүе менән бер хәтирә иҫтә ҡалған. 1985 йылдың апрель башында мине Наил Әҡсәнович менән хәрби комиссариатҡа саҡырҙылар. Армияға китергә. Минең мәктәптә эшләп йөрөгән сағым. Барҙыҡ Белоретҡа, үттек. Ҡайтышлай Егәҙелә кемдә ҡунғанбыҙҙыр, онотолған. Таң менән леспромхоз машинаһында ярты юлға тиклем килдек, шунда Зәйтүнә еңгәне осраттыҡ. Аяҙ көн, туңдырған, яҙ килгәне һиҙелә, ҡар ирей ҙә башламаған әле, юл таҡыр, атлауы еңел, күңелле. Шырышҡы күпере аша сыҡҡайныҡ, ары бер аҙым да үтеп булмай бит әй, көрт аҫтында бот төбөнә хәтлем һыу! Аптырап, шунда күпме торғанбыҙ икән нимә эшләргә белмәйенсә. Берҙән бер өмөт, берәй саналы ат килеп сыҡмаҫмы, тигәндән. Әллә, Шырышҡығамы, Егәҙегәме кире әйләнеп, ат ялларғамы? Шулайтып торғанда, арттан мәрхүм Рүзәк ағай килеп етмәһенме, санала?! Эше менән Баҡыйға китеп бара. Хызыр Ильяс һымаҡ күренде ул беҙгә! Мөғжизә! Шырышҡы яланында ат, бауырына еткән һыу ҡатыш көрт кисеп үтте Еҙем күперенә хәтлем, беҙ санала, арттан ҡарлы һыу ғына урғылып ҡала!” Эйе, бында халыҡҡа мөғжизәгә ышанып йәшәрә генә ҡала... Тик фажиғәләренә генә тарымаһындар ине, тип теләргә ҡала. Фото: vk.com/id513045559