Бөгөн Башҡортостан Башлығы Радий Хәбиров уҙғарған аҙналыҡ оператив кәңәшмәлә элемтә инфраструктураһын үҫтереүгә йомғаҡ яһалды һәм 2024 йылға ошо йүнәлештәге эш пландары тикшерелде. Республиканың дәүләт идаралығын һанлы үҫтереү министры Геннадий Разумикин, кәрәҙле элемтә хеҙмәттәре менән республика халҡының 92 проценттан ашыуы файҙалана ала, тип белдерҙе. Шуның менән бергә иң ҙур һорау менән ҡулланған сервистар – ул видеохостингтар, социаль селтәрҙәр һәм мессенджерҙар. – 2023 йылда элемтә операторҙары 4G стандартындағы 1,3 мең база станцияһын яңыртты. Киләһе йылда иһә был эште 2 мең станция күләмендә башҡарырға ниәтләйҙәр, – тип хәбәр итте Геннадий Разумикин. Юғары тиҙлекле оптосүсле интернетҡа 2023 йылда 43 меңгә яҡын йорт хужалығы тоташҡан, был уҙған йылға ҡарағанда һигеҙ тапҡырға күберәк. Башҡортостанда юғары тиҙлекле интернетты йәмғеһе 232 мең абонент файҙалана. Элемтә инфраструктураһының үҫешенә 100-ҙән алып 500-гә тиклем кеше йәшәгән бәләкәй тораҡ пункттарҙа “Һанлы тигеҙһеҙлекте бөтөрөү 2.0” кәрәҙле элемтә база станцияларын ҡуйыу программаһы ла булышлыҡ иткән. Уға 1 286 ауыл ингән. Проект 2030 йылға тиклем иҫәпләнгән. Быйыл 242 ауылда база станциялары ҡуйылған. Ә 2024 йылда тағы 50 ауылда программаны ғәмәлгә ашырыу күҙаллана. Бынан тыш, республиканың Һанлы үҫеш министрлығы Сибай-Аҡъяр республика автомобиль юлын кәрәҙле элемтә һәм мобиль интернет менән тәьмин итеү буйынса мөһим проектты тормошҡа ашырҙы. Инфраструктураны артабан үҫтереү өсөн инвестор компанияларға инвестиция проекттарына һалынған аҡсаның 90 проценты күләмендә табышҡа һалым буйынса ҡайтарма биреләсәк. Өфө-Белорет трассаһын тотороҡло кәрәҙле элемтә һәм интернет менән тәьмин итеү ошо механизмды файҙаланыусы тәүге башланғыстарҙың береһе буласаҡ. Башҡортостан Башлығы республиканың Һанлы үҫеш министрлығы коллективына күләмле һәм һөҙөмтәле эшләгәне өсөн рәхмәт белдерҙе. –Һеҙ беҙҙең халыҡ мәнфәғәтендә бик күп эш башҡараһығыҙ. "Һанлы тигеҙһеҙлекте бөтөрөү 2.0" программаһы уларҙың сифатлы элемтәгә ихтыяжын ҡәнәғәтләндерергә мөмкинлек бирә, шул иҫәптән республика юлдары буйлап йөрөгәндә лә, - тине Радий Хәбиров. Фото: Башҡортостан Башлығы сайты.