Икенсе йыл рәттән Башҡортостан юлдаш телевидениеһы Рәсәй төбәктәренең мотлаҡ дөйөм ҡулланыштағы телеканалдары араһында телевизион ҡарау өлөшө буйынса беренсе урынды биләй (“21-се төймә”). Был хаҡта аҙналыҡ оператив кәңәшмә барышында ”Башҡортостан” телерадиокомпанияһының генераль директоры Рөстәм Зәрәфетдинов хәбәр итте. Роскомнадзор тарафынан илдәге берҙән-бер аккредитацияланған үлсәүсе “Mediascope” компанияһы мәғлүмәттәренә ҡарағанда, 2023 йылда Башҡортостан юлдаш телевидениеһы 9,3 телеҡарау өлөшө менән, хатта федераль “Беренсе канал”ды уҙып китеп, республикала йәшәүселәр араһында иң популяр өс телеканал иҫәбенә инде. Башҡортостан юлдаш телевидениеһы был күрһәткес менән башҡа төбәктәрҙең мотлаҡ дөйөм ҡулланыштағы телеканалдары менән сағыштырғанда ла күпкә алдынғыраҡ тора, Силәбе, Омск, Хабаровск, Ҡазан һәм Иркутск ҡалаларын байтаҡҡа уҙып китә. Рөстәм Зәрәфетдинов мәғлүмәт һәм ижтимағи-сәйәси тапшырыуҙарҙы арттырыу иҫәбенә лә ошоға өлгәшелеүен билдәләне. – Беҙ тиҙ арала дөйөм ижтимағи-сәйәси контексҡа иғтибар итәбеҙ һәм тапшырыуҙар селтәрен үҙгәртәбеҙ. Бөгөн аудиторияның рәсми һәм тикшерелгән мәғлүмәттәргә ихтыяжы ҙур, айырыуса фейктар күп ваҡытта. Яңы телемиҙгелдә киске ижтимағи-сәйәси тапшырыуҙарҙы үҙгәрттек. Хәҙер яңыртылған студияла эшләйбеҙ, шуның өсөн һеҙгә, Радий Фәрит улы, ҙур рәхмәт, – тине директор. – Яңыраҡ сыҡҡан “Башҡортостан Башлығының тура линияһы”ның һандары ла хәҙерге телевидениела ижтимағи-сәйәси контенттың роле артыуы тураһындағы тезисты раҫлай. Был көндө һеҙҙең республика халҡы менән аралашыуығыҙ көндөң төп телеваҡиғаһына әйләнде, ул параллель рәүештә барған федераль каналдарҙағы проекттарға ҡарағанда ике тапҡырға тиерлек күберәк ҡаралды. Канал махсус хәрби операция темаһына ҙур иғтибар бүлә. 2023 йылдың көҙөнән ике яңы проект “Үҙебеҙҙекеләрҙе ташламайбыҙ” һәм “МХО яңылыҡтары” махсус сығарылышы эфирға сыға. – Беҙ даими үҙгәреп торабыҙ – был заманса медиаларҙың ҡәтғи талаптары. Телеканалдарыбыҙ һәм радиостанцияларыбыҙ эфирына бик күп үҙенсәлекле проекттар сыға – мәғлүмәт, күңел асыу, документаль, музыкаль, спорт. Яңы программалар даими булдырыла, – тине Рөстәм Зәрәфетдинов. – Киләсәктә лә тамашасыларыбыҙҙы һәм тыңлаусыларыбыҙҙы ҡыҙыҡлы йөкмәтке менән ҡыуандырырбыҙ. – Башҡортостан юлдаш телевидениеһының Рәсәйҙең төбәк телеканалдары араһында аудитория буйынса беренсе урын алыуы – иҫ киткес һөҙөмтә, – тине Радий Хәбиров. – Беҙ Башҡортостан юлдаш телеканалының бөтә командаһына рәхмәт белдерәбеҙ. Һеҙ – беҙҙең төп партнер. Беҙ һеҙҙең менән республика ҡаҙаныштары хаҡында һөйләйбеҙ, яугирҙәребеҙгә ярҙам күрһәтәбеҙ. Бынан тыш, һеҙҙең бик көслө өҫтөнлөгөгөҙ бар – ул ике теллелек, программалар рус һәм башҡорт телдәрендә сыға. Быйылғы йыл өсөн рәхмәт. Был - бик шәп һандар. Алдынғылыҡты һаҡлап ҡалыу өсөн йыл һайын яңы продукт тәҡдим итергә кәрәк. Фото: Башҡортостан Башлығы сайты.