Найти тему
Башҡортостан гәзите

Кемдәр улар иң-иңдәр?

25 декабрҙә Башҡортостан Башлығы Радий Хәбиров уҙғарған аҙналыҡ оператив кәңәшмәлә республиканың урындағы үҙидара органдары эшмәкәрлегенең 2022 йылғы һөҙөмтәлелегенә комплекслы баһаға йомғаҡ яһалды. Вице-премьер – төбәк Хөкүмәте Аппараты етәксеһе Азамат Абдрахманов билдәләүенсә, был баһа Рәсәй Президентының туғыҙ эшмәкәрлек йүнәлеше буйынса указына ярашлы 41 күрһәткес сиктәрендә 2009 йылдан алып үткәрелә. Улар, атап әйткәндә, иҡтисади үҫеш кимәлен, мәктәпкәсә һәм дөйөм белем биреүҙә, мәҙәниәт һәм спортта, торлаҡ-коммуналь хужалыҡтағы хәлде билдәләй. Еңеүселәрҙе билдәләгәндә өс йыл эсендәге күрһәткестәр динамикаһы иҫәпкә алына. 2022 йыл йомғаҡтары буйынса лидерҙар: - ҡала округтары араһында - Октябрьский ҡалаһы (1-се урын); - административ үҙәге ҡала булған райондар араһында Ишембай (1-се урын) һәм Мәләүез (2-се урын); - ауыл райондары араһында - Әбйәлил (1-се урын), Өфө (2-се урын), Ейәнсура (3-сө урын), Ауырғазы (4-се урын), Шаран (5-се урын) һәм Мәсетле (6-сы урын) райондары. Азамат Абдрахманов 2023 йыл йомғаҡтары буйынса “Йыл ҡаҙанышы” республика конкурсы еңеүселәре булған муниципалитеттарҙы ла атаны. Хәтерегеҙгә төшөрәбеҙ, 2020 йылдың октябрендә Радий Хәбиров иң яҡшы муниципалитеттарҙы билдәләү өсөн конкурс уҙғарыу тәртибен һәм рейтинг төҙөү методикаһын билдәләгән указға ҡул ҡуйҙы. Рейтинг төҙөгәндә биләмәләр өс төркөмгә бүленде: ҡала округтары, административ үҙәге ҡалала булған райондар һәм ауыл райондары. Өҫтәүенә өсөнсө төркөмдә бер юлы өс призёр билдәләнә. 2023 йыл йомғаҡтары буйынса “Һаулыҡ һәм демографик үҫеш” номинацияһында Нефтекама, Дүртөйлө һәм Саҡмағош райондары еңеүсе тип танылды. Икенсе урын – Архангел районында, өсөнсө – Бөрйәндә. “Социаль үҫеш” номинацияһында Өфө, Благовещен һәм Ғафури райондары грантҡа лайыҡ булды. Икенсе урында - Иглин районы, өсөнсөлә - Әлшәй. “Тотороҡло иҡтисади үҫеш” номинацияһында Стәрлетамаҡ, Стәрлетамаҡ һәм Нуриман райондары иң яҡшылары булды. Икенсе урын - Фёдоровка районында, өсөнсө - Ҡариҙел районында. “Хәүефһеҙ һәм уңайлы биләмә” номинацияһында Межгорье, Туймазы һәм Шишмә райондары еңеү яуланы. Икенсе урында - Тәтешле районы, өсөнсөлә - Асҡын. “Мәғлүмәти асыҡлыҡ һәм халыҡ менән кире бәйләнеш” номинацияһында гранттар Салауат, Яңауыл һәм Ҡырмыҫҡалы райондарына тапшырыла. Икенсе урын - Ҡалтасы районында, өсөнсө - Кушнаренко районында. Еңеүсе муниципалитеттар грант аҡсаһын биләмәләрҙе артабан үҫтереүгә йүнәлтә. – Муниципалитеттарҙы ҡотлайым, бөтәһе лә берҙәм эшләне. Барығыҙға ла уңыштар теләйем, афариндар. Артабан да шулай булһын! – тине Радий Хәбиров.