Конституция – тотороҡло үҫешенең төп стратегик векторы

Башҡортостан Республикаһы Дәүләт Йыйылышы-Ҡоролтай йортонда республика Конституцияһының 30 йыллығына арналған “Башҡортостан Республикаһы Конституцияһына 30 йыл: хоҡуҡи потенциал һәм яңы өҫтөнлөктәр” Бөтә Рәсәй ғилми-ғәмәли конференцияһы үтте. Сараны Башҡортостан Республикаһының Конституция советы ойошторҙо. Конференция эшендә дәүләт власы органдары, урындағы үҙидара, йәмәғәт ойошмалары, мәғариф һәм фәнни учреждениелар вәкилдәре ҡатнашты. Шулай уҡ видеоконференция режимында сараға Яҡутстан һәм Татарстандан конституция советтары рәйестәре ҡушылды. Башҡортостан Башлығы исеменән сәләмләү һүҙе менән Башҡортостан Башлығы Хакимиәте етәксеһе урынбаҫары Искәндәр Әхмәтвәлиев сығыш яһаны. Башҡортостан Республикаһы Дәүләт Йыйылышы – Ҡоролтай Рәйесе Константин Толкачев исеменән ҡатнашыусыларҙы Һәм ҡунаҡтарҙы Башҡортостан Республикаһы Дәүләт Йыйылышы – Ҡоролтай Рәйесе урынбаҫары Илшат Тажетдинов сәләмләне. – Конституция принциптары һәм нормалары тормошҡа ашырыла ғына түгел, ә республиканың тотороҡло үҫешенең төп стратегик векторы булып хеҙмәт итә, тип ҡыйыу раҫлай алабыҙ. Күп осраҡта Башҡортостандың Төп Законында нығытылған принциптар ярҙамында төбәктең һөҙөмтәле үҫешен, республиканың күп милләтле халҡы алдындағы бөтә социаль йөкләмәләрҙе үтәүҙе һәм уның һәр яҡлап үҫешен тәьмин итеүсе заманса власть органдары системаһын булдырыу мөмкин булды, – тине Илшат Тажетдинов. Башҡортостан Республикаһы Конституция Советы рәйесе Хәйҙәр Вәлиев белдереүенсә, 30 йыл билдәле дата ғына түгел, ә тарихи әһәмиәткә эйә ваҡиға ла, тип билдәләне. – Быйылғы форум Башҡортостан Республикаһы Конституцияһының 30 йыллығы алдынан үткәрелә. Мин тулыһынса ышанам, был республикабыҙ өсөн әһәмиәтле дата ғына түгел – ул тарихи әһәмиәткә эйә ваҡиға. Рәсәй Федерацияһы субъекты булараҡ конституцион-хоҡуҡи үҫештең 30 йыллыҡ юлы Башҡортостандың бер төп закон менән “ҡулда” үтеүе менән ғорурланырға тейешбеҙ, – тине Хәйҙәр Вәлиев. Башҡортостан Республикаһы Конституция Советы рәйесе конференцияның республиканың ғилми-ғәмәли тормошонда мөһим этап булырына ышаныс белдерҙе. – Гражданлыҡ һәм патриотизм тәрбиәләү халыҡтың хоҡуҡи мәҙәниәтен күтәрмәйенсә мөмкин түгел. Был эште, һис шикһеҙ, конституцион положениеларҙы аңлатыуҙан башларға кәрәк. Республика Конституцияһының нормалары һәм ҡиммәттәре һәр кешегә билдәле һәм аңлайышлы булырға, уны аңлатыу буйынса эш даими һәм системалы ойошторолорға тейеш. Конституция Советы халыҡ араһында конституцион ҡиммәттәрҙе таратыу буйынса вәкәләттәр сиктәрендә киң аудиторияға йүнәлтелгән төрлө форматтағы саралар – төрлө өлкә белгестәре өсөн түңәрәк өҫтәлдәр, киң аудитория өсөн киң мәғлүмәт сараларында мәғлүмәт урынлаштырыу, юғары уҡыу йорттарында уҡыусылар өсөн лекциялар уҡыу, уҡыусылар менән уйын формалары үткәрә. Бөгөнгө конференция Башҡортостан Республикаһының ғилми-ғәмәли тормошонда мөһим этап булыр, ғалим-хоҡуҡ белгестәре үткәргән конституцион-хоҡуҡи тикшеренеүҙәргә тос өлөш индерер, конституцион хоҡуҡ өлкәһендә ғилми тикшеренеүҙәрҙе дауам итеү өсөн стимулдар булдырыр, төбәк ҡануниәтен артабан камиллаштырыуға һәм дәүләт институттарының һөҙөмтәлелеген күтәреүгә булышлыҡ итер, тигән ышаныс белдерәм, – тине Хәйҙәр Вәлиев. Конференцияла докладтар менән Башҡортостан Республикаһы Юғары Суды Рәйесе Рәил Шәйҙуллин, отставкалағы Башҡортостан Республикаһы Конституция Суды судьяһы Зөфәр Йәнекәев, Дәүләт Йыйылышы - Ҡоролтайҙың Дәүләт төҙөлөшө Һәм урындағы үҙидара буйынса комитеты рәйесе Владимир Нагорный, Рәсәй Дәүләт юстиция университетының конституцион хоҡуҡ кафедраһы мөдире, юридик фәндәр докторы, профессор, Рәсәй Федерацияһының атҡаҙанған юрисы, отставкалағы Башҡортостан Республикаһы Конституция Суды судьяһы Владимир Сафонов, Өфө фән һәм технологиялар университеты ректоры кәңәшсеһе, Рәсәй иҡтисадсыһы һәм сәйәси эшмәкәре, өсөнсө, дүртенсе һәм етенсе саҡырылыш Дәүләт Думаһы депутаты, иҡтисад фәндәре кандидаты Михаил Бугера һәм башҡалар сығыш яһаны. Эш барышында ҡатнашыусылар Башҡортостан Республикаһының социаль-иҡтисади үҫешендәге конституцион өҫтөнлөктәрҙе, Конституция нормаларын һәм принциптарын тормошҡа ашырыу проблемаларын һәм перспективаларын, 2020 йылғы конституцион реформаны, яңы конституцион өҫтөнлөктәр яҡтыһында кеше һәм граждан хоҡуҡтарын һәм азатлыҡтарын яҡлауҙы тикшерҙе. Фото һәм мәғлүмәт сығанағы: gsrb.ru/ru