Әбйәлил районында йәшәгән блогер Рәхимә Мусина әленән-әле үҙенең ҡыҙыҡлы яҙмалары менән ҡыуандырып тора. Был юлы бейәләй хаҡындағы яҙған посы күптәрҙә ҙур ҡыҙыҡһыныу уятты. Уны һеҙгә лә тәҡдим итәбеҙ. "Тағы эҙләйем инде. Миңә һыңар бейәләй тип исем ҡушһаң да үс ҡанмаҫ. Былай һыңары юғалһа, кире табып ала торғаным ул. Йә үткән юлымдан, йә магазинда, йә автобуста... Пары менән төшөп ҡалһа – хуш, Хәйрүш — икенсе берәүҙең ҡулдарын йылыта башларға ваҡыттары еткән тигән һүҙ.Бер ваҡыт апайым (их, үҙе уҡыһа ҡыйын була инде!) тыуған көнөмә дебеттән өвөрөһө ҡабарып ҡына торған бейәләй бүләк итте. Әллә ниндәй һыуыҡтарҙа ла ҡулды май кеүек кенә тота ине. Тыҡшайып ултырып киткәйне, тағы ла йылырҙы. Һыңарлап күпме юғалттым мин уны, юҡ, йыбанмай, детектив кеүек юллап йөрөп, барыбер табып алып, әллә күпме кейеп йөрөнөм. Ә бер көн пары менән юғалттым и фсе...Икенсе апайым матууур күн бирсәткәләр бүләк итте. “Әй, миңә кеше уны бирәме, барыбер юғалтам бит”, - тинем. Юғалттым. Ә бына иң үкенесле юғалтыуым тураһында берәүгә лә һөйләгәнем булманы, бөгөн сер итеп һеҙгә генә яҙам.Студент саҡта Яңы йылға ғәҙәттәгесә бейәләйемде поезда онотоп ҡалдырып, ҡулдарым ҡып-ҡыҙыл булып туңып ҡайтып индем. Әсәйем төн йоҡоһон ҡалдырып, йөн иләргә тотондо, аҙаҡ бәйләп ултырҙы. Иртәгә юлға тигәндә тамамлап, кистән йыуып, иртәгәһенә өр-яңы ап-аҡ бейәләйҙәр кейҙереп, “инде юғалтма”ларын әйтеп оҙатып ҡалды.Башкировоз-поезд Өфөгә таң менән килеп етә бит инде. Общежитиеға килеп ингәс тә стенала хаттар һала торған нәмә элеүле тора. Шуның бер ячейкаһына бейәләйҙәремде тыҡтым да почта ҡарарға тотондом. Бер-ике открытка килгән ине, шуның ҡыуанысынан бейәләйҙәрҙе онотоп бүлмәмә ингәнем дә киткәнем. Иҫкә төшкәндә... елдәр иҫкәйне инде. Бер-ике көн тағы ҡул туңғас, ул-был пряжа остоҡтарын ялғап бәйләп алырға тура килде.Бейәләйҙәр жалко түгел, әсәйемде йәлләп иланым. Баламдың ҡулдарын йылытып ебәрҙем тип ҡыуанып ултырып ҡалғандыр инде, ә мин уның күпме күҙ нуры түккән, йөрәк йылыһы һалған хеҙмәтен исмаһам бер көн һаҡлай алманым. Әле лә иҫкә төшһә, кухняла төндә яңғыҙы һағышлы көйҙәр көйләй-көйләй бәйләп ултырған әсәйем күҙ алдына килә лә күҙгә йәштәр тығыла. Бер нәмәгә ҡыуанам: әл дә йәшлек иҫәрлеге менән юғалтыуымды үҙенә әйтмәгәнмен...????Бейәләйҙән дә пост яһай икән кеше тимәгеҙ! Бөгөн көнө шундай – календарҙа Бейәләйҙәр көнө! Ҡотлай торған дата түгел, шулай ҙа теләгем бар: тормошта юғалтыуҙарығыҙ булһа, иң ҙур юғалтыу – бейәләйҙәр булһын", -тип яҙған ул. Ә һеҙ бейәләйҙәрегеҙҙе юғалтҡанығыҙ бармы? Бәлки һеҙҙең дә ҡыҙыҡлы хәтирәләрегеҙ барҙыр, беҙҙең менән уртаҡлашһағыҙ ине. Фото һәм текст сығанағы: Рәхимә Мусина.