Хыялдар тормошҡа аша

Благовещен районының Удельно-Дыуанай ауылында, “Һаулыҡ һаҡлау” милли проектының тәүге звеноны яңыртыу программаһына ярашлы, яңы модулле фельдшер-акушерлыҡ пункты асылды. Ауылдаштарҙың теләге ҡабул булды. Бина заманса уңайлыҡтар менән тәьмин ителгән, йылылыҡ һәм һыу селтәрҙәре үткәрелгән, аҙ хәрәкәтләнгән кешеләр өсөн пандус ҡуйылған. Юғары тиҙлекле интернет үткәрелеүе фельдшер өсөн яңы мөмкинлектәр аса, республика медицина мәғлүмәт системаһына инеп, ЭКГ һөҙөмтәләрен алырға, телемедицина консультацияһы үткәрергә була. Яңы медицина учреждениеһында 481 кеше хеҙмәтләндереләсәк. Фельдшер Оксана Мурашко бында 2013 йылдан алып эшләй, халыҡ араһында лайыҡлы хөрмәт, абруй ҡаҙанған. – Хәҙер ауыл халҡы йәшәгән урынға яҡын ерҙә сифатлы медицина алыу мөмкинлегенә эйә. Бының өсөн ҡалаға йөрөүҙең кәрәге ҡалманы, диспансерлаштырыу үтергә, вакцина ҡаҙатырға, кәрәкле дарыуҙарҙы ошонда уҡ алыу мөмкинлеге артты, – ти Благовещен дауаханаһының баш табибы Жанна Карунас. Рәсәй Президенты Владимир Путиндың “май “ указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологияларҙы индереү мөһим бурыстарҙың береһе булып тора.”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновацион медицина технологияларын индереү, шул иҫәптән пациенттар сәләмәтлеген иртә диагностикалау һәм дистанциянан тороп мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығы.