Бөгөн, 23 декабрҙә, Өфөлә төбәк етәксеһе Радий Хәбиров Башҡортостан Башлығы ҡарамағындағы Мәҙәниәт һәм сәнғәт үҫеше буйынса советтың ултырышын уҙғарҙы. Ул Башҡорт дәүләт ҡурсаҡ театрының реконструкциянан һуң яңыртылған бинаһында үтте. Ултырышта сенаторҙар, Рәсәй Дәүләт Думаһы һәм Башҡортостандың Дәүләт Йыйылышы - Ҡоролтай депутаттары, профиль министрлыҡ һәм ведомство етәкселәре, мәҙәниәт учреждениелары вкилдәре ҡатнашты. Башҡортостан Башлығы ултырышты асып, республиканың мәҙәниәт өлкәһендә быйылғы һөҙөмтәләрен барланы. - Һәр осрашыуҙы эшлекле сара һымаҡ итеп уҙғарырға тырышабыҙ, сөнки һеҙҙең тәҡдимдәрегеҙгә таянып финанс-ойоштороу ҡарарҙарын ҡабул итәбеҙ. 2023 йылда мәҙәниәт үҫешенә 14 миллиардтан ашыу аҡса йүнәлттек. Был иһә былтырғы менән сағыштырғанда 12,3 процентҡа күберәк. Был ҙур һан. Ул беҙҙе шатландыра. Беҙҙең бурысыбыҙ – йыл һайын финанслау күләмен арттыра барыу, - тине Радий Хәбиров. Республика етәксеһе 2022 йылда Мәҙәниәт буйынса советтың тәүге ултырышында ҡабул ителгән ҡарарҙарҙың күбеһенең тормошҡа ашырылыуын билдәләне. Мәҫәлән, Башҡортостан кинематографистарына грантҡа 50 миллион һум йүнәлтелгән. Республиканың өс милли драма театрҙары – рус, башҡорт һәм татар театрҙары яңы постановкалар эшләүгә 10-ар миллион һум аҡса алған. Айырым иғтибар ауылдарҙағы мәҙәниәткә йүнәлтелә. 2023 йылдың аҙағына тиклем Белорет районының Тирлән һәм Иглин районының Оло-Теләк ауылдарында ике социаль-мәҙәни үҙәк асыласаҡ. 2024 йылда, пилот проекты булараҡ, муниципалитеттарҙа өс модулле клуб төҙөләсәк. - Башҡортостан – ауыл мәҙәниәте, спорты, мәғарифы хеҙмәткәрҙәренә ярҙам күрһәтелгән һирәк төбәктәрҙең береһе. Өсөнсө йыл рәттән беҙ “Ауыл мәҙәниәт хеҙмәткәре” республика программаһын тормошҡа ашырабыҙ. 2023 йылдан түләүҙең күләмен 1 миллион һумға тиклем арттырҙыҡ. Быйыл уны 30 кеше алды, - тине Радий Хәбиров. Дөйөм алғанда, кәңәшмәлә үткән йылда мәҙәниәт тармағының һөҙөмтәле эшләүе тураһында әйтелде. Фото: Башҡортостан Башлығы сайтынан.