Йылына 12 меңгә тиклем ярымтағылма эшләргә йыйыналар

22 декабрҙә Башҡортостан Башлығы Радий Хәбиров һәм «КамАЗ» асыҡ акционерҙар йәмғиәтенең генераль директоры Сергей Когогин Туймазы бетон ташыусы машиналар эшләү заводының етештереү майҙансыҡтарында булды. Республикала предприятие 1976 йылда төҙөлә башлай. Ошо йылда Яр Саллыла конвейерҙан оҙаҡ ваҡыт Башҡортостан биләмәһендә эшләгән «КамАЗ» маркалы беренсе автомобиль сыға. Ә Туймазыла етештереү 1980 йылда башлана. 2023 йылдың декабренә заводта 1,5 мең белгес эшләй. Предприятиеның автобетон бутағыстар баҙарындағы өлөшө - 52 процент, автобетоннасос баҙарында 23 процент тәшкил итә. Ул Рәсәйҙә берҙән-бер автобетоннасос техникаһы етештереүсе булып тора, ул донъяның 20-нән ашыу иленә оҙатыла. 2023 йылдың 11 айында бында сәнәғәт етештереү индексы 179,8 процент тәшкил иткән, ә тейәп оҙатылған продукцияның күләме 9,5 миллиард һумға еткән. Предприятиеның генераль директоры Фидан Арыҫланов һөйләүенсә, бетонбутағыс һәм насос техникаһы заводтың визит карточкаһы булып иҫәпләнә. Заводта яңы үҫеш йүнәлештәре иҫәбендә шторлы ярымтағылмалар әҙерләүҙең тулы циклы үҙләштерелә. - Рәсәй баҙарының йыллыҡ күләме - 60 мең ярымтағылма. Был техниканың байтаҡ өлөшөн тотонолған килеш сит илдәрҙән килтерәләр, - тине Фидан Арыҫланов. - Беҙҙең завод ҡеүәттәре йыл һайын 12 меңгә яҡын төрлө тағылма сығарырға мөмкинлек бирәсәк. 2024 йылда технологик процестарҙы роботлаштырыу буйынса проектты ғәмәлгә ашырыу күҙаллана. Был тағылма техника өсөн рамдар етештереү һәм әҙерләү сифатын күтәрәсәк, шулай уҡ етештереү сығымдарын да кәметәсәк. Сығанаҡ: https://glavarb.ru/rus/press_serv/novosti/173231.html