Быйыл Хәйбулла районының Оло Әбеш ауылы республикала үткән "Айыҡ ауыл" конкурсында район данын яҡлай. Конкурс сиктәрендә ауылда төрлө саралар үтә, элекке һөнәрҙәр өйрәнелә, боронғо шөғөлдәр тергеҙелә. Был хаҡта ауылдың социаль төркөмөндә хәбәр ителә. "Тырыз (диал. туйыҙ) — ҡайын туҙынан эшләнгән, көнкүрештә ҡулланылған һауыт. Ҡапҡаслап, тотор өсөн бау йәки ағас һап беркетеп эшләнгән күнәксек йәки бормаса. Ҡайын туҙынан һауытты төрлө ҙурлыҡта һәм рәүештә ҡапҡаслап яһағандар. Туҙҙың ике яғы ла тышта ҡалдырыла алған. Бәләкәй һауыттарҙы ғәҙәттә туҙҙың аҡ йоҡа өлөшөн һыҙырып алып, төрлө биҙәктәр һалып та эшләгәндәр. Уның эсенә ҡаймаҡ, ҡатыҡ кеүек шыйыҡ аҙыҡ һалырға ла, тоҙ, ярма кеүек ризыҡтарҙы һаҡларға ла мөмкин булған. Туҙҙан эшләнгән һауыттар бөгөн дә ҡулланыла һәм интерьерҙы биҙәүсе бер элемент булараҡ та көнкүрешкә инеп бара, ә бына уны эшләй белеүселәр юҡ тиерлек. Онотолоп барған ошо шөғөлдө тергеҙеү маҡсатында Оло Әбеш ауылының оҫта ҡуллы ир-уҙамандары - Фәрит Танһыҡ улы Юнысов һәм Таһир Мөғлитдин улы Юнысов тырыз эшләргә тотонған. Ҡулдарын шымартып, оҫтарып алһалар, был үҙенсәлекле эшкә улар балаларҙы ла өйрәтмәксе. Беҙгә ҡалһа, бынамын тигән тырыздар килеп сыҡҡан, шулай бит, дуҫтар?!" - тип яҙған улар. Фото һәм текст сығанағы: Оло Әбеш ауылы төркөмөнән. #Айыҡауыл2023#Трҽзвоҽсҽло2023