Ғаиләгә ярҙам - төп бурыс

Бөгөн Башҡортостан Башлығы Радий Хәбиров Дәүләт Йыйылышы – Ҡоролтай депутаттарына йыллыҡ Мөрәжәғәтнамә менән сығыш яһаны. Ул унда социаль өлкәгә, балалыҡты һәм ғаиләне яҡлауға ҙур иғтибар бүлде. – Социаль өлкә – кешеләр өсөн иң яҡын һәм мөһим тема. Һәм, әлбиттә, тәү сиратта демография. Киләһе йылды ил Президенты Ғаилә йылы тип иғлан итте. Был йәнә бер тапҡыр ғаилә ҡиммәттәрен нығытыу, ғаиләгә, әсәлеккә, аталыҡҡа һәм балалыҡҡа ярҙам итеү – беҙҙең үҙгәрешһеҙ өҫтөнлөктәребеҙ булыуын һыҙыҡ өҫтөнә ала, – тине ул. – 10 йыл эсендә Башҡортостанда күп балалы ғаиләләр һаны дүрттән бер өлөшкә – 59 меңгә тиклем артҡан. Уларҙың иҫәбе буйынса беҙ – Волга буйы федераль округында беренсе һәм Рәсәйҙә етенсе. Тыуым кимәле беҙҙә ил һәм округ буйынса уртаса алғанда юғарыраҡ. 230 меңдән ашыу балалы ғаилә льготалар менән файҙалана. Радий Фәрит улы һаулыҡ һаҡлау системаһына ла туҡталды. Башҡортостанда тармаҡты яңыртыу буйынса эш дауам итә. Был туранан-тура күп кенә сирҙәрҙән, тәү сиратта, йөрәк-ҡан тамырҙары ауырыуҙарынан һәм онкологиянан үлем осраҡтарын кәметеүгә булышлыҡ итә. – Беҙ быйыл Башҡортостан тарихында иң юғары ғүмер оҙайлығына - 73 йәштән өлкәнерәккә өлгәштек. Шул уҡ ваҡытта барыбыҙ ҙа яҡшы аңларға тейеш – был ҙур срок түгел. Был өлкәлә башҡараһы эштәр һәм ҡотҡараһы ғүмерҙәр күп, – тине ул. – Һуңғы тиҫтә йылда Өфөнөң һаулыҡ һаҡлау өлкәһен яңыртыу программаһын тормошҡа ашырыу тураһында ҡарар ҡабул ителде. Уға 118 объект инә. Хаҡы – 8 миллиард һум. Киләһе йылда уны тормошҡа ашырыуға – 500 миллион һум, ә 2025 йылдан башлап йыл һайын 1,5 миллиард һум йүнәлтәбеҙ. Беренсел звеноны яңыртыу республика программаһы сиктәрендә Затон биҫтәһендә 9-сы дауахана поликлиникаһы сафҡа индерелде. Ошо көндәрҙә Баймаҡта һәм Мәсәғүттә поликлиникалар, Оло Ыҡтамаҡта ашығыс ярҙам станцияһы менән дауахана асабыҙ. Шулай уҡ быйыл 43 муниципалитетта 80 модулле фельдшер-акушерлыҡ пункты, туғыҙ табип амбулаторияһы һәм биш табип практикаһы офисы асылған. Киләһе йылда уларға тағы 54 модулле фельдшер-акушерлыҡ пункты һәм биш амбулатория өҫтәйбеҙ. Тиҙҙән Өфөләге Балалар онкологияһы һәм гематология үҙәге кескәй пациенттарҙы ҡабул итә башлай. Киләһе йылда Республика кардиология үҙәге биналарын реконструкциялауҙы тамамлайҙар, унда ҡеүәтле хирургия корпусы асыласаҡ. Шулай уҡ Ҡырмыҫҡалыла һәм Кушнаренкола поликлиникалар, Учалыла хирургия корпусы асала. “Салют” республика реабилитация һәм белем биреү үҙәген төҙөкләндереүҙе тамамлайҙар. – Быйылдан башлап ҙур булмаған тораҡ пункттарҙа эшләй башлаған терапевтар, педиатрҙар һәм дөйөм практика табиптары 3 миллион һум аҡса ала башланы. Шулай ҙа табиптар һәм фельдшерҙар менән тәьмин итеү бурысы – муниципалитет башлыҡтары хәстәрлеге ул. Һәр хакимиәт башлығынан быны үҙенең мөһим бурысы тип иҫәпләүен һорайым. Быйыл йәй асылған Өфө хосписы - ул шулай уҡ лайыҡлы тормошто дауам итеү, ҡайғы уртаҡлашыу һәм хәстәрлек күреү тураһында тарих. Айрат Нурмөхәмәтов фотоһы.