Махсус хәрби операция башланыу менән илебеҙ халҡы яугирҙәргә ярҙам итергә тотондо. Кем нисек булдыра, шулай булышлыҡ итә. Күптәр йыйылышып маскировка селтәрҙәре үрә. Был күп ваҡытты талап иткән ваҡ эш егеттәребеҙҙең ғүмерҙәрен һаҡлай. Башҡортостан Журналистар союзы рәйесе, “Башҡортостан” гәзитенең баш мөхәррире Вәдүт Исхаҡов етәкселегендә журналистар махсус хәрби операция биләмәһенә сираттағы эш командировкаһына барған саҡта "Масксети Щит Уфа" ҡыҙҙары бәйләгән селтәрҙәрҙе яугирҙәргә алып барҙы. “С.Зорин исемендәге танк батальоны яугирҙәренә "Масксети Щит Уфа" ҡыҙҙары бәйләп ебәргән маскировка селтәрҙәрен алып барып тапшырҙым. Әйткәндәй, маскировка селтәрҙәре яугирҙәргә бик кәрәк. Ошо уңайҙан батальонда хеҙмәт иткән яҡташтарым Ришат Зөлмөхәмәтов ("Муха"), Булат Ишҡолов ("Һәйет") һәм Баймаҡ районының Беренсе Этҡол ауылы егете Хәлил Сөләймәнов("Алға") бөтә Башҡортостан халҡына ҡайнар сәләмен һәм рәхмәтен ебәрҙе”, – тип яҙҙы был турала Вәдүт Исхаҡов социаль селтәрҙә. Әйткәндәй, был селтәрҙәрҙе улар “Башҡортостан” мото уҡсылар полкы разведчиктарына ла тапшырған. Командир бөтә подразделение исеменән рәхмәт әйткән һәм был селтәрҙәр бик кәрәк тигән. Был хаҡта оҙаҡламай гәзитебеҙҙә мәҡәләләр донъя күрер. Фото: "Бәйләнештә".